safir-e-laila-2

nazar uThāo safīr-e-lailā bure tamāshoñ kā shahr dekho

ye merā qarya ye vahshatoñ kā amiin qarya

tumheñ dikhā.ūñ

ye sehan-e-masjid thā yaañ pe āyat-farosh baiThe duā.eñ ḳhilqat ko bechte the

yahāñ adālat thī aur qaazī amaan dete the rahzanoñ ko

aur is jagah par vo ḳhān-qāheñ thiiñ aab o ātish kī manDiyāñ thiiñ

jahāñ pe amrad-parast baiThe safā-e-dil kī namāzeñ paḌh kar

ḳhayāl-e-duniyā se jaañ haTāte

safīr-e-lailā maiñ kyā batā.ūñ ki ab to sadiyāñ guzar chukī haiñ

magar suno ai ġharīb-e-sāya ki tum sharīfoñ ke rāz-dāñ ho

yahī vo din the maiñ bhuul jā.ūñ to mujh pe lānat

yahī vo din the safīr-e-lailā hamārī bastī meñ chhe taraf se fareb utre

daroñ se aage gharoñ ke bīchoñ phir us se chūlhoñ kī hāñDiyoñ meñ

javān-o-pīr-o-zanān-e-qarya ḳhushī se raqsāñ

tamām raqsāñ

hujūm-e-tiflāñ thā yā tamāshe the boznoñ ke

ki koī dīvār-o-dar na chhoḌā

vo un pe chaḌh kar sharīf chehroñ kī gardanoñ ko phalāñgte the

Darāz-qāmat lahīm baune

razā-e-bāham se kolhuoñ meñ jute hue the

ḳhrāste the vo zard ġhalla to us ke pisne se ḳhuun bahtā thā pattharoñ se

magar na āñkheñ ki dekh pā.īñ na un kī nākeñ ki sūñghte vo

faqat vo bailoñ kī chakkiyāñ thiiñ saroñ se ḳhālī

fareb khāte the ḳhuun piite the aur nīndeñ thiiñ bajjuoñ kī

safīr-e-lailā ye dāstāñ hai isī khañDar kī

isī khañDar ke tamāsh-bīnoñ fareb-ḳhurdoñ kī dāstāñ hai

magar suno ajnabī shanāsā

kabhī na kahnā ki maiñ ne qarnoñ ke fāsloñ ko nahīñ sameTā

fasīl-e-qarya ke sar pe pheñkī ga.ī kamandeñ nahīñ utārīñ

tumheñ dikhā.ūñ tabāh bastī ke ek jānib buland Tiila

buland Tiile pe baiThe baiThe havannaqoñ-sā

kabhī to rotā thā apnī āñkhoñ pe haath rakh kar kabhī musalsal maiñ ūñghtā thā

maiñ ūñghtā thā ki saañs le luuñ

magar vo chūlhoñ pe hāñDiyoñ meñ fareb pakte

siyāh sāñpoñ kī aisī kāyā-kalap huī thī ki merī āñkhoñ pe jam ga.e the

so yaañ pe baiThā maiñ aane vaale dhueñ kī talḳhī batā rahā thā

ḳhabar ke aañsū bahā rahā thā

magar maiñ tanhā safīr-e-lailā

faqat ḳhayāloñ kī bādshāhī mirī virāsat

tamām qarye kā ek shā.ir tamām qarye kā ik la.iiñ thā

yahī sabab hai safīr-e-lailā maiñ yaañ se niklā to kaise ghuTnoñ ke bal uThā thā

nasīb-e-hijrat ko dekhtā thā

safar kī saḳhtī ko jāntā thā

ye sabz qariyoñ se sadiyoñ pīchhe kī manziloñ kā safar thā mujh ko

jo gard-e-sahrā meñ lipTe ḳhāroñ kī tez nokoñ pe jald karnā thā aur

vo aisā safar nahīñ thā jahāñ pe saa.e kā rizq hotā

jahāñ havāoñ kā lams miltā

farishte āvāz-e-al-amāñ meñ mire liye hī

ajal kī rahmat ko māñgte the

yahī vo lamhe the jab shafaq ke tavīl Tīloñ pe chalte chalte

maiñ dil ke zaḳhmoñ ko saath le kar

safar ke parbat se paar utrā

nazar uThao safir-e-laila bure tamashon ka shahr dekho

ye mera qarya ye wahshaton ka amin qarya

tumhein dikhaun

ye sehan-e-masjid tha yan pe aayat-farosh baiThe duaen KHilqat ko bechte the

yahan adalat thi aur qazi aman dete the rahzanon ko

aur is jagah par wo KHan-qahen thin aab o aatish ki manDiyan thin

jahan pe amrad-parast baiThe safa-e-dil ki namazen paDh kar

KHayal-e-duniya se jaan haTate

safir-e-laila main kya bataun ki ab to sadiyan guzar chuki hain

magar suno ai gharib-e-saya ki tum sharifon ke raaz-dan ho

yahi wo din the main bhul jaun to mujh pe lanat

yahi wo din the safir-e-laila hamari basti mein chhe taraf se fareb utre

daron se aage gharon ke bichon phir us se chulhon ki hanDiyon mein

jawan-o-pir-o-zanan-e-qarya KHushi se raqsan

tamam raqsan

hujum-e-tiflan tha ya tamashe the boznon ke

ki koi diwar-o-dar na chhoDa

wo un pe chaDh kar sharif chehron ki gardanon ko phalangte the

Daraaz-qamat lahim baune

raza-e-baham se kolhuon mein jute hue the

KHraste the wo zard ghalla to us ke pisne se KHun bahta tha pattharon se

magar na aankhen ki dekh pain na un ki naken ki sunghte wo

faqat wo bailon ki chakkiyan thin saron se KHali

fareb khate the KHun pite the aur ninden thin bajjuon ki

safir-e-laila ye dastan hai isi khanDar ki

isi khanDar ke tamash-binon fareb-KHurdon ki dastan hai

magar suno ajnabi shanasa

kabhi na kahna ki main ne qarnon ke faslon ko nahin sameTa

fasil-e-qarya ke sar pe phenki gai kamanden nahin utarin

tumhein dikhaun tabah basti ke ek jaanib buland Tila

buland Tile pe baiThe baiThe hawannaqon-sa

kabhi to rota tha apni aankhon pe hath rakh kar kabhi musalsal main unghta tha

main unghta tha ki sans le lun

magar wo chulhon pe hanDiyon mein fareb pakte

siyah sanpon ki aisi kaya-kalap hui thi ki meri aankhon pe jam gae the

so yan pe baiTha main aane wale dhuen ki talKHi bata raha tha

KHabar ke aansu baha raha tha

magar main tanha safir-e-laila

faqat KHayalon ki baadshahi meri wirasat

tamam qarye ka ek shair tamam qarye ka ek lain tha

yahi sabab hai safir-e-laila main yan se nikla to kaise ghuTnon ke bal uTha tha

nasib-e-hijrat ko dekhta tha

safar ki saKHti ko jaanta tha

ye sabz qariyon se sadiyon pichhe ki manzilon ka safar tha mujh ko

jo gard-e-sahra mein lipTe KHaron ki tez nokon pe jald karna tha aur

wo aisa safar nahin tha jahan pe sae ka rizq hota

jahan hawaon ka lams milta

farishte aawaz-e-al-aman mein mere liye hi

ajal ki rahmat ko mangte the

yahi wo lamhe the jab shafaq ke tawil Tilon pe chalte chalte

main dil ke zaKHmon ko sath le kar

safar ke parbat se par utra