safir-e-laila-4

harīm-e-mahmil meñ aa gayā huuñ salām le lo

salām le lo ki maiñ tumhārā amīn-e-qāsid ḳhajil musāfir azā kī vaadī se lauT aayā

maiñ lauT aayā magar sarāsīma is tarah se

ki pichhle qadmoñ palaT ke dekhā na guzre rastoñ ke fāsloñ ko

jahāñ pe mere nishān-e-pā ab thake thake se gire paḌe the

harīm-e-mahmil meñ vo safīr-e-naved-parvar

jise zamāne ke past o baalā ne itne qisse paḌhā diye the

jo pahle qarnoñ kī tīrgī ko ujaal dete

tumheñ ḳhabar hai

ye merā siina qadīm ahrām meñ akelā vo ik haram thā

aziim rāzoñ ke kohna tābūt jis kī kaḌiyoñ meñ bas rahe the

unhīñ havāoñ kā Dar nahīñ thā

na sahrā-zādoñ ke naslī kā hī un kī gird-e-ḳhabar ko pahuñche

harīm-e-mahmil meñ vo amānat kā pāsbāñ huuñ

jo charm-e-āhū ke narm kāġhaz pe likkhe naame ko le ke niklā

vahī ki jis ke savār hone ko tum ne baḳhshā jahāz-e-sahrā

tavīl rāhoñ meñ ḳhālī mashkoñ kā baar le kar hazār sadiyāñ safar meñ gardāñ

kahīñ sarāboñ kī bahtī chāñdī kahīñ chaTānoñ kī saḳht qāsheñ

mayān-e-rāh-e-safar khaḌe the jakaḌne vaale nazar ke lobhī

magar na bhaTkā bhaTakne vaalā

jo dam liyā to azā meñ jā kar

harīm-e-mahmil suno fasāne jo sun sako to

maiñ chalte chalte safar ke āḳhir pe aisī vaadī meñ jā ke Thahrā

aur us pe guzre harīs lamhoñ ke un nishānoñ ko dekh aayā

jahāñ ke naqshe bigaḌ ga.e haiñ

jahāñ ke tabqe ulaT ga.e haiñ

vahāñ kī fasleñ zaqqūm kī haiñ

havā.eñ kaalī haiñ raakh uḌ kar khañDar meñ aise phunkārtī hai

ki jaise azhdar chahār jānib se jabḌe khole ġhadar machāte

zamīñ pe kiina nikālte hoñ

kasīf zahroñ kī thailiyoñ ko ġhazab se bāhar uchhālte hoñ

muhīb saa.e meñ devtāoñ kā raqs jaarī thā

TuuTe hāthoñ kī haDDiyoñ se vo dohl-e-bātil ko pīTte the

za.iif kavvoñ ne ahl-e-qarya kī qabreñ khodīñ

tū un ke nāḳhun nahīf panjoñ se jhaḌ ke aise bikhar rahe the

chakoñdaroñ ne chabā ke pheñke hoñ jaise haDDī ke ḳhushk reze

harīm-e-mahmil vahī vo manzil thī jis ke siine pe maiñ tumhārī nazar se pahuñchā uThā.e mehr o vafā ke naame

vahīñ pe baiThā thā sar-ba-zānū tumhārā mahram

khañDar ke bosīda pattharoñ par hazīn o ġhamgīñ

vahīñ pe baiThā thā

qatl-nāmoñ ke mahzaroñ ko vo paḌh rahā thā

jo pastiyoñ ke kotāh hāthoñ ne us kī qismat meñ likh diye the

harīm-e-mahmil maiñ apne naaqa se nīche utrā to maiñ ne dekhā ki us kī āñkheñ ḳhamosh o vīrāñ

ġhubār-e-sahrā mizha pe larzāñ thā ret dīdoñ meñ uḌ rahī thī

magar sharāfat kī ek lau thī ki us ke chehre pe narm haala kiye hue thī

vo mere lahje ko jāntā thā

hazār manzil kī dūriyoñ ke satā.e qāsid ke ukhḌe qadmoñ kī chaap sunte hī uTh khaḌā thā

dayār-e-vahshat meñ bas rahā thā

pe terī sāñsoñ ke zer-o-bam se uThī harārat se āshnā thā

vo kah rahā thā yahāñ se jaao ki yaañ ḳharāboñ ke kār-ḳhāne haiñ

roz o shab ke jo silsile haiñ khule ḳhasāroñ kī manDiyāñ haiñ

vo Dar rahā thā tumhārā qāsid kahīñ ḳhasāroñ meñ baT na jaa.e

harīm-e-mahmil maiñ kyā batā.ūñ vahīñ pe khoyā thā merā naaqa

faqat ḳharābe ke chand lamhe hī us ke guude ko khā ga.e the

usī maqām-e-tilism-gar meñ vo ustaḳhvānoñ meñ Dhal gayā thā

jahāñ pe bikhrā paḌā thā pahle tumhāre mahram kā asp-e-tāzī

aur ab vo naaqa ke ustuḳhvāñ bhī

tumhāre mahram ke asp-e-tāzī ke ustaḳhvānoñ meñ mil ga.e haiñ

harīm-e-mahmil vahī vo patthar the jin pe rakkhe the maiñ ne mehr o vafā ke naame

jahāñ pe zinda rutoñ meñ bāñdhe the tum ne paimān o ahd apne

magar vo patthar ki ab ajā.ib kī kārgah haiñ

tumhāre naame kī us ibārat ko khā ga.e haiñ

shifā ke hāthoñ se jis ko tum ne raqam kiyā thā

so ab na naaqa na koī naama na le ke aayā javāb-e-nāma

maiñ nā-murād o ḳhajil musāfir

magar tumhārā amiin qāsid azā kī vaadī se lauT aayā

aur us najīb o karīm mahram-e-vafā ke paikar ko dekh aayā

jo aane vaale dinoñ kī ghaḌiyāñ abad kī sāñsoñ se gin rahā hai

harim-e-mahmil mein aa gaya hun salam le lo

salam le lo ki main tumhaara amin-e-qasid KHajil musafir aza ki wadi se lauT aaya

main lauT aaya magar sarasima is tarah se

ki pichhle qadmon palaT ke dekha na guzre raston ke faslon ko

jahan pe mere nishan-e-pa ab thake thake se gire paDe the

harim-e-mahmil mein wo safir-e-nawed-parwar

jise zamane ke past o baala ne itne qisse paDha diye the

jo pahle qarnon ki tirgi ko ujal dete

tumhein KHabar hai

ye mera sina qadim ahram mein akela wo ek haram tha

azim raazon ke kohna tabut jis ki kaDiyon mein bas rahe the

unhin hawaon ka Dar nahin tha

na sahra-zadon ke nasli ka hi un ki gird-e-KHabar ko pahunche

harim-e-mahmil mein wo amanat ka pasban hun

jo charm-e-ahu ke narm kaghaz pe likkhe name ko le ke nikla

wahi ki jis ke sawar hone ko tum ne baKHsha jahaz-e-sahra

tawil rahon mein KHali mashkon ka bar le kar hazar sadiyan safar mein gardan

kahin sarabon ki bahti chandi kahin chaTanon ki saKHt qashen

mayan-e-rah-e-safar khaDe the jakaDne wale nazar ke lobhi

magar na bhaTka bhaTakne wala

jo dam liya to aza mein ja kar

harim-e-mahmil suno fasane jo sun sako to

main chalte chalte safar ke aaKHir pe aisi wadi mein ja ke Thahra

aur us pe guzre haris lamhon ke un nishanon ko dekh aaya

jahan ke naqshe bigaD gae hain

jahan ke tabqe ulaT gae hain

wahan ki faslen zaqqum ki hain

hawaen kali hain rakh uD kar khanDar mein aise phunkarti hai

ki jaise azhdar chahaar jaanib se jabDe khole ghadar machate

zamin pe kina nikalte hon

kasif zahron ki thailiyon ko ghazab se bahar uchhaalte hon

muhib sae mein dewtaon ka raqs jari tha

TuTe hathon ki haDDiyon se wo dohl-e-baatil ko piTte the

zaif kawwon ne ahl-e-qarya ki qabren khodin

tu un ke naKHun nahif panjon se jhaD ke aise bikhar rahe the

chakondaron ne chaba ke phenke hon jaise haDDi ke KHushk reze

harim-e-mahmil wahi wo manzil thi jis ke sine pe main tumhaari nazar se pahuncha uThae mehr o wafa ke name

wahin pe baiTha tha sar-ba-zanu tumhaara mahram

khanDar ke bosida pattharon par hazin o ghamgin

wahin pe baiTha tha

qatl-namon ke mahzaron ko wo paDh raha tha

jo pastiyon ke kotah hathon ne us ki qismat mein likh diye the

harim-e-mahmil main apne naqa se niche utra to main ne dekha ki us ki aankhen KHamosh o viran

ghubar-e-sahra mizha pe larzan tha ret didon mein uD rahi thi

magar sharafat ki ek lau thi ki us ke chehre pe narm haala kiye hue thi

wo mere lahje ko jaanta tha

hazar manzil ki duriyon ke satae qasid ke ukhDe qadmon ki chap sunte hi uTh khaDa tha

dayar-e-wahshat mein bas raha tha

pe teri sanson ke zer-o-bam se uThi hararat se aashna tha

wo kah raha tha yahan se jao ki yan KHarabon ke kar-KHane hain

roz o shab ke jo silsile hain khule KHasaron ki manDiyan hain

wo Dar raha tha tumhaara qasid kahin KHasaron mein baT na jae

harim-e-mahmil main kya bataun wahin pe khoya tha mera naqa

faqat KHarabe ke chand lamhe hi us ke gude ko kha gae the

usi maqam-e-tilism-gar mein wo ustaKHwanon mein Dhal gaya tha

jahan pe bikhra paDa tha pahle tumhaare mahram ka asp-e-tazi

aur ab wo naqa ke ustuKHwan bhi

tumhaare mahram ke asp-e-tazi ke ustaKHwanon mein mil gae hain

harim-e-mahmil wahi wo patthar the jin pe rakkhe the main ne mehr o wafa ke name

jahan pe zinda ruton mein bandhe the tum ne paiman o ahd apne

magar wo patthar ki ab ajaib ki kargah hain

tumhaare name ki us ibarat ko kha gae hain

shifa ke hathon se jis ko tum ne raqam kiya tha

so ab na naqa na koi nama na le ke aaya jawab-e-nama

main na-murad o KHajil musafir

magar tumhaara amin qasid aza ki wadi se lauT aaya

aur us najib o karim mahram-e-wafa ke paikar ko dekh aaya

jo aane wale dinon ki ghaDiyan abad ki sanson se gin raha hai