sag-e-ham-safar aur main

sag-e-ham-safar aur maiñ

vahāñ aa ga.e haiñ

jahāñ ḳhatm hai kā.enāt

yahāñ se nasheb-e-zamān-o-makāñ kā agar jā.eza leñ

to lagtā hai jaise dhuñdlakoñ ke us paar

jo kuchh bhī hai Thiik hai

hasb-e-ma.amūl hai

mirā naam shenānDorā hai

maiñ kitnī sadiyoñ se us bahr-e-zaḳhḳhār meñ ḳhema-zan thā

jo mavvāj samt-e-digar meñ rahā

ek din

daf-e-āseb o raf-e-balā ke liye

kuchh pur-asrār fiqroñ kī gardān kartā huā

jāda-e-ḳhauf par gāmzan thā

maiñ apne shabistāñ kī jānib

ki ik larzish-e-nā-gahāñ se guzarnā paḌā

to andhe zamānoñ kī sahrā-navardī ke āḳhir meñ

vo ek tārīk lamha thā jab

sag-e-ham-safar aur maiñ

māñda o gursana

yahāñ is ilāqe meñ vārid hue

aur añdhere meñ kuchh fāsle par tirī raushnī dekh kar

raqs karne lage

sag-e-ham-safar aur maiñ

sag-e-ham-safar aur maiñ

sag-e-ham-safar aur main

wahan aa gae hain

jahan KHatm hai kaenat

yahan se nasheb-e-zaman-o-makan ka agar jaeza len

to lagta hai jaise dhundlakon ke us par

jo kuchh bhi hai Thik hai

hasb-e-mamul hai

mera nam shenanDora hai

main kitni sadiyon se us bahr-e-zaKHKHar mein KHema-zan tha

jo mawwaj samt-e-digar mein raha

ek din

daf-e-aseb o raf-e-bala ke liye

kuchh pur-asrar fiqron ki gardan karta hua

jada-e-KHauf par gamzan tha

main apne shabistan ki jaanib

ki ek larzish-e-na-gahan se guzarna paDa

to andhe zamanon ki sahra-nawardi ke aaKHir mein

wo ek tarik lamha tha jab

sag-e-ham-safar aur main

manda o gursana

yahan is ilaqe mein warid hue

aur andhere mein kuchh fasle par teri raushni dekh kar

raqs karne lage

sag-e-ham-safar aur main

sag-e-ham-safar aur main