sahra sahra

maiñ kyuuñ ik kamre meñ ik kursī par baiThā

apne andar chalte chalte thak jaatā huuñ

bachpan kī tasvīreñ yādeñ

ghuTne meñ jo choT lagī thī

haath se miTTī chhān ke bahte ḳhuun ko kaise rok liyā thā

vo maktab, college, daftar, ghar

ūbaḌ-khābaḌ raste

girte-paḌte kyā batlā.ūñ

kaise apne ghar aayā huuñ

kin bāzāroñ se guzrā huuñ

har chehra thā patthar kā

har dūkān thī shīshe kī

har dīvār se Takrāyā huuñ

ab apne zaḳhmoñ ko gintā huuñ

aur vo choTeñ kahāñ chhupī baiThī haiñ

jin kā lahū

andar hī andar bahtā hai

ik kursī par baiThā

dīvār-o-dar ko takte

ik kāġhaz par sahrā sahrā likhte

maiñ apne hī andar

chalte chalte thak jaatā huuñ...!

main kyun ek kamre mein ek kursi par baiTha

apne andar chalte chalte thak jata hun

bachpan ki taswiren yaaden

ghuTne mein jo choT lagi thi

hath se miTTi chhan ke bahte KHun ko kaise rok liya tha

wo maktab, college, daftar, ghar

ubaD-khabaD raste

girte-paDte kya batlaun

kaise apne ghar aaya hun

kin bazaron se guzra hun

har chehra tha patthar ka

har dukan thi shishe ki

har diwar se Takraya hun

ab apne zaKHmon ko ginta hun

aur wo choTen kahan chhupi baiThi hain

jin ka lahu

andar hi andar bahta hai

ek kursi par baiTha

diwar-o-dar ko takte

ek kaghaz par sahra sahra likhte

main apne hi andar

chalte chalte thak jata hun!