salamti

habīb tū hai samī'-ul-'alīm bhī tū hai

aziim tū hai rahīm-o-karīm bhī tū hai

havā.eñ terī haiñ lail-o-nahār tere haiñ

pahāḌ dasht ye sab ābshār tere haiñ

hai tū hī qādir-e-mutlaq jahān tere haiñ

zamīn terī hai aur āsmān tere haiñ

tire karam kī koī intihā nahīñ maulā

tire nizām meñ sab kuchh hai kyā nahīñ maulā

tire huzūr meñ haiñ nazr mere dil ke sujūd

magar ye ruḳh bhī to hai kā.enāt kā ma.abūd

ye kā.enāt jo taḳhlīq-e-zāt hai terī

azal se is ke muqaddar meñ intishār hai kyoñ

zamīñ pe aa.e the aadam tirī mashiyyat se

jo terī bazm se rusvā.iyāñ bhī laa.e the

tirī bahisht meñ dil apnā chhoḌ aa.e the

udāsiyoñ kā abhī tak vo hī hisār hai kyoñ

ye kā.enāt to taḳhlīq-e-zāt hai terī

ye kā.enāt tirī shān-e-kibriyā.ī hai

agar banāyā hai is ko to rakh ise mahfūz

ye roz roz fasādāt kyoñ ubharte haiñ

tire hī bande haiñ jo be-gunāh marte haiñ

ġhurūr-e-mohtasib-o-sheher-dār hai har-sū

fasād bhī to tire naam par hī hote haiñ

harīm-e-dil ke dar-o-bām hil rahe haiñ bahut

tire hī naam se sangīniyāñ ubhar aa.iiñ

vo dekh tere hī ghar kī taraf hai ruḳh un kā

jidhar nigāh uThī nafrateñ nazar aa.iiñ

qalandaroñ ke maqābir pe ḳhaak uḌtī hai

munāfiqat ke añdheroñ kā bol-bālā hai

tire faqīhoñ ne hākim se dostī kar lī

salāmtī meñ haram hai na ab shivāla hai

vo dekh jānib-e-mehrāb phir huī yūrish

vo ek sar hai jo neze pe rakkhā jaatā hai

kisī kā ḳhushk galā hai kisī kā ḳhanjar hai

jo sar uThā.ūñ to āñkhoñ meñ ḳhuun aatā hai

jamāl-e-hastī-e-nau-e-bashar hai ḳhatre meñ

ye kā.enāt tirī shān-e-kibriyā.ī hai

munāfiqoñ se bachā le hasīn chehroñ ko

jo dil kī baat thī merī zabāñ tak aa.ī hai

tirī sifāt pe sajde hazār kartā huuñ

maiñ ab zabān na kholūñgā tujh se Dartā huuñ

habib tu hai sami'-ul-'alim bhi tu hai

azim tu hai rahim-o-karim bhi tu hai

hawaen teri hain lail-o-nahaar tere hain

pahaD dasht ye sab aabshaar tere hain

hai tu hi qadir-e-mutlaq jahan tere hain

zamin teri hai aur aasman tere hain

tere karam ki koi intiha nahin maula

tere nizam mein sab kuchh hai kya nahin maula

tere huzur mein hain nazr mere dil ke sujud

magar ye ruKH bhi to hai kaenat ka mabud

ye kaenat jo taKHliq-e-zat hai teri

azal se is ke muqaddar mein intishaar hai kyon

zamin pe aae the aadam teri mashiyyat se

jo teri bazm se ruswaiyan bhi lae the

teri bahisht mein dil apna chhoD aae the

udasiyon ka abhi tak wo hi hisar hai kyon

ye kaenat to taKHliq-e-zat hai teri

ye kaenat teri shan-e-kibriyai hai

agar banaya hai is ko to rakh ise mahfuz

ye roz roz fasadat kyon ubharte hain

tere hi bande hain jo be-gunah marte hain

ghurur-e-mohtasib-o-sheher-dar hai har-su

fasad bhi to tere nam par hi hote hain

harim-e-dil ke dar-o-baam hil rahe hain bahut

tere hi nam se sanginiyan ubhar aain

wo dekh tere hi ghar ki taraf hai ruKH un ka

jidhar nigah uThi nafraten nazar aain

qalandaron ke maqabir pe KHak uDti hai

munafiqat ke andheron ka bol-baala hai

tere faqihon ne hakim se dosti kar li

salamti mein haram hai na ab shiwala hai

wo dekh jaanib-e-mehrab phir hui yurish

wo ek sar hai jo neze pe rakkha jata hai

kisi ka KHushk gala hai kisi ka KHanjar hai

jo sar uThaun to aankhon mein KHun aata hai

jamal-e-hasti-e-nau-e-bashar hai KHatre mein

ye kaenat teri shan-e-kibriyai hai

munafiqon se bacha le hasin chehron ko

jo dil ki baat thi meri zaban tak aai hai

teri sifat pe sajde hazar karta hun

main ab zaban na kholunga tujh se Darta hun