samandar ka sukut

aaj phir ghaat meñ baiThā hai samundar kā sukūt

ham ko ik dūsre se duur hī rahnā hogā

ham ko har haal meñ majbūr hī rahnā hogā

mujh ko is daur-e-jarāhat se guzar jaane de

mujh ko jiine kī tamannā nahīñ mar jaane de

merī taqdīr meñ ġham haiñ to koī baat nahīñ

mujh ko zulmat kī guphāoñ meñ utar jaane de

tū na ghabrā ki tire husn kī mish.al le kar

tere hamrāh kabhī tere bichhaune ke qarīb

raat bhar dhuum machā.egā mire jism kā bhuut

aaj phir ghaat meñ baiThā hai samundar kā sukūt

zarf baaqī na koī azm-e-nihāñ baaqī hai

sirf ehsās ke chehre pe dhuāñ baaqī hai

koī saaya hai na sāthī hai na mahfil koī

dilkashī ḳhatm hai phir kyuuñ ye jahāñ baaqī hai

ye jahāñ jis meñ sab atrāf tabāhī ke nishāñ

sūrat o shakl pe zaḳhmoñ kī tarah phaile haiñ

aur har zaḳhm hai insān kī vahshat kā subūt

aaj phir ghaat meñ baiThā hai samundar kā sukūt

talḳh tanhā.ī kā ik dard liye chehre par

le ke phirtā huuñ maiñ zaḳhmoñ ke diye chehre par

ruuh majrūh jabīñ zaḳhm-zada dil ghā.il

phir bhī hañstā huuñ na.ī aas liye chehre par

zindagī hai ki kisī shaah kī begam jis ko

vaqt bāzār meñ laayā hai barhana kar ke

aur ḳhāmosh haiñ tahzīb o tamaddun ke sapūt

aaj phir ghaat meñ baiThā hai samundar kā sukūt

vaqt kahtā hai hameñ duur hī rahnā hogā

ham ko har haal meñ majbūr hī rahnā hogā

aaj phir ghat mein baiTha hai samundar ka sukut

hum ko ek dusre se dur hi rahna hoga

hum ko har haal mein majbur hi rahna hoga

mujh ko is daur-e-jarahat se guzar jaane de

mujh ko jine ki tamanna nahin mar jaane de

meri taqdir mein gham hain to koi baat nahin

mujh ko zulmat ki guphaon mein utar jaane de

tu na ghabra ki tere husn ki mishal le kar

tere hamrah kabhi tere bichhaune ke qarib

raat bhar dhum machaega mere jism ka bhut

aaj phir ghat mein baiTha hai samundar ka sukut

zarf baqi na koi azm-e-nihan baqi hai

sirf ehsas ke chehre pe dhuan baqi hai

koi saya hai na sathi hai na mahfil koi

dilkashi KHatm hai phir kyun ye jahan baqi hai

ye jahan jis mein sab atraf tabahi ke nishan

surat o shakl pe zaKHmon ki tarah phaile hain

aur har zaKHm hai insan ki wahshat ka subut

aaj phir ghat mein baiTha hai samundar ka sukut

talKH tanhai ka ek dard liye chehre par

le ke phirta hun main zaKHmon ke diye chehre par

ruh majruh jabin zaKHm-zada dil ghail

phir bhi hansta hun nai aas liye chehre par

zindagi hai ki kisi shah ki begam jis ko

waqt bazar mein laya hai barhana kar ke

aur KHamosh hain tahzib o tamaddun ke saput

aaj phir ghat mein baiTha hai samundar ka sukut

waqt kahta hai hamein dur hi rahna hoga

hum ko har haal mein majbur hi rahna hoga