sambhaala

tanhā.ī shikasta par sameTe

ākāsh kī vus.atoñ pe hairāñ

hasrat se ḳhalā meñ tak rahī hai

yādoñ ke sulagte abr-pāre

afsurda dhueñ meñ Dhal chuke haiñ

pahnā-e-ḳhayāl ke dhundalke

ab tīra-o-tār ho ga.e haiñ

aañsū bhī nahīñ ki ro sakūñ maiñ

ye maut hai zindagī nahīñ hai

ab aa.e koī mujhe uThā kar

is ūñche pahāḌ se paTak de

har samt fazā.eñ chīḳh uTTheñ

bādal bhī garaj garaj ke barseñ

koñdoñ ke kaḌakte tāziyāne

lahrā.eñ ghanī siyāh shab ke

siine meñ ka.ī shigāf kar deñ

tārīkiyāñ phir lapak ke uTTheñ

aapas meñ lipaT lipaT ke larzeñ

aur TūTte girte lākhoñ ashjār

kahte raheñ mujh se sambhlo sambhlo

maiñ saḳht o siyāh pattharoñ se

Takrātā huā luḌhaktā jā.ūñ

is shor meñ koī kah rahā ho

ye maut nahīñ hai zindagī hai

tanhai shikasta par sameTe

aakash ki wusaton pe hairan

hasrat se KHala mein tak rahi hai

yaadon ke sulagte abr-pare

afsurda dhuen mein Dhal chuke hain

pahna-e-KHayal ke dhundalke

ab tira-o-tar ho gae hain

aansu bhi nahin ki ro sakun main

ye maut hai zindagi nahin hai

ab aae koi mujhe uTha kar

is unche pahaD se paTak de

har samt fazaen chiKH uTThen

baadal bhi garaj garaj ke barsen

kondon ke kaDakte taziyane

lahraen ghani siyah shab ke

sine mein kai shigaf kar den

tarikiyan phir lapak ke uTThen

aapas mein lipaT lipaT ke larzen

aur TuTte girte lakhon ashjar

kahte rahen mujh se sambhlo sambhlo

main saKHt o siyah pattharon se

Takraata hua luDhakta jaun

is shor mein koi kah raha ho

ye maut nahin hai zindagi hai