samundar aur main

ik din mujh se samundar ne kahā

kaun uThā.egā mirā bār-e-girāñ

apnī āshufta-sarī kī ḳhātir

maiñ ne qurbān kiyā aish-e-jahāñ

raat ko chain na din ko ārām

umr nāshād kaTī garm-e-fuġhāñ

muzmahil ho ga.e aazā mere

dast o pā meñ na rahī taab o tavāñ

mauj ko khel se fursat hī nahīñ

is subuk sar ko mirī fikr kahāñ

kuchh tavaqqo thī mujhe sāhil se

vo magar niklā faqat reg-e-ravāñ

bādal aate haiñ chale jaate haiñ

ek pal meñ yahāñ ik pal meñ vahāñ

is zamāne meñ ho kis se ummīd

ġham se begāna samajh saktā hai

dard kā raaz mohabbat kī zabāñ

apne siine meñ biThā lo mujh ko

tā ki maiñ pā.ūñ mashaqqat se amaañ

sun ke bechāre kī rūdād-e-alam

kar liyā maiñ ne use dil meñ nihāñ

aao dekho mire ashkoñ meñ use

ik samundar hai karāñ-tā-ba-karāñ

ek din mujh se samundar ne kaha

kaun uThaega mera bar-e-giran

apni aashufta-sari ki KHatir

main ne qurban kiya aish-e-jahan

raat ko chain na din ko aaram

umr nashad kaTi garm-e-fughan

muzmahil ho gae aaza mere

dast o pa mein na rahi tab o tawan

mauj ko khel se fursat hi nahin

is subuk sar ko meri fikr kahan

kuchh tawaqqo thi mujhe sahil se

wo magar nikla faqat reg-e-rawan

baadal aate hain chale jate hain

ek pal mein yahan ek pal mein wahan

is zamane mein ho kis se ummid

gham se begana samajh sakta hai

dard ka raaz mohabbat ki zaban

apne sine mein biTha lo mujh ko

ta ki main paun mashaqqat se aman

sun ke bechaare ki rudad-e-alam

kar liya main ne use dil mein nihan

aao dekho mere ashkon mein use

ek samundar hai karan-ta-ba-karan