samundar aur tishnagi

samundar ke kināre

chāñdnī rātoñ meñ baiThā

un hasīñ shāmoñ ko akasr yaad kartā huuñ

vo shāmeñ jab vo mere saath hotī thī

samundar kī nihāyat shoḳh lahroñ meñ

ikaTThe ham bhī patthar pheñkte the

aur phir ham khilkhilā kar hañs dete the

magar ab chāñdnī rātoñ meñ jab maiñ

sair ko jaatā huuñ tanhā.ī kā kambal oḌh letā huuñ

samundar ke kināre jab bhī gahrī soch meñ Dūbūñ

udāsī ḳhāmushī se paas aa kar baiTh jaatī hai

mire kañdhe pe hamdardī se apnā haath rakhtī hai

vo kuchh kahtī nahīñ lekin mujhe ma.alūm hai vo

is fazā aur merī āñkhoñ kī namī mahsūs kartī hai

namī jo muddatoñ ke ba.ad bhī mujh ko bahut maġhmūm rakhtī hai

samundar ke kinare

chandni raaton mein baiTha

un hasin shamon ko akasr yaad karta hun

wo shamen jab wo mere sath hoti thi

samundar ki nihayat shoKH lahron mein

ikaTThe hum bhi patthar phenkte the

aur phir hum khilkhila kar hans dete the

magar ab chandni raaton mein jab main

sair ko jata hun tanhai ka kambal oDh leta hun

samundar ke kinare jab bhi gahri soch mein Dubun

udasi KHamushi se pas aa kar baiTh jati hai

mere kandhe pe hamdardi se apna hath rakhti hai

wo kuchh kahti nahin lekin mujhe malum hai wo

is faza aur meri aankhon ki nami mahsus karti hai

nami jo muddaton ke baad bhi mujh ko bahut maghmum rakhti hai