samundar ka bulawa

ye sargoshiyāñ kah rahī haiñ ab aao ki barsoñ se tum ko bulāte bulāte mire

dil pe gahrī thakan chhā rahī hai

kabhī ek pal ko kabhī ek arsa sadā.eñ sunī haiñ magar ye anokhī nidā aa rahī hai

bulāte bulāte to koī na ab tak thakā hai na ā.inda shāyad thakegā

mire pyāre bachche mujhe tum se kitnī mohabbat hai dekho agar

yuuñ kiyā to

burā mujh se baḌh kar na koī bhī hogā ḳhudāyā ḳhudāyā

kabhī ek siskī kabhī ik tabassum kabhī sirf tevarī

magar ye sadā.eñ to aatī rahī haiñ

inhī se hayāt-e-do-rozā abad se milī hai

magar ye anokhī nidā jis pe gahrī thakan chhā rahī hai

ye har ik sadā ko miTāne kī dhamkī diye jā rahī hai

ab āñkhoñ meñ jumbish na chehre pe koī tabassum na tevarī

faqat kaan sunte chale jā rahe haiñ

ye ik gulistāñ hai havā lahlahātī hai kaliyāñ chaTaktī haiñ

ġhunche mahakte haiñ aur phuul khilte haiñ khil khil ke murjhā ke

girte haiñ ik farsh-e-maḳhmal banāte haiñ jis par

mirī ārzūoñ kī pariyāñ ajab aan se yuuñ ravāñ haiñ

ki jaise gulistāñ hī ik ā.īna hai

isī ā.īne se har ik shakl nikhrī sañvar kar miTī aur miT hī ga.ī phir na ubhrī

ye parbat hai ḳhāmosh sākin

kabhī koī chashma ubalte hue pūchhtā hai ki us kī chaTānoñ ke us paar kyā hai

magar mujh ko parbat kā dāman hī kaafī hai dāman meñ vaadī hai vaadī meñ naddī

hai naddī meñ bahtī huī naav hī ā.īna hai

isī ā.īne meñ har ik shakl nikhrī magar ek pal meñ jo miTne lagī hai to

phir na ubhrī

ye sahrā hai phailā huā ḳhushk be-barg sahrā

bagūle yahāñ tund bhūtoñ kā aks-e-mojassam bane haiñ

magar maiñ to duur ek peḌoñ ke jhurmuT pe apnī nigāheñ jamā.e hue huuñ

na ab koī sahrā na parbat na koī gulistāñ

ab āñkhoñ meñ jumbish na chehre pe koī tabassum na tevarī

faqat ek anokhī sadā kah rahī hai ki tum ko bulāte bulāte mire dil pe

gahrī thakan chhā rahī hai

bulāte bulāte to koī na ab tak thakā hai na shāyad thakegā

to phir ye nidā ā.īna hai faqat maiñ thakā huuñ

na sahrā na parbat na koī gulistāñ faqat ab samundar bulātā hai mujh ko

ki har shai samundar se aa.ī samundar meñ jā kar milegī

ye sargoshiyan kah rahi hain ab aao ki barson se tum ko bulate bulate mere

dil pe gahri thakan chha rahi hai

kabhi ek pal ko kabhi ek arsa sadaen suni hain magar ye anokhi nida aa rahi hai

bulate bulate to koi na ab tak thaka hai na aainda shayad thakega

mere pyare bachche mujhe tum se kitni mohabbat hai dekho agar

yun kiya to

bura mujh se baDh kar na koi bhi hoga KHudaya KHudaya

kabhi ek siski kabhi ek tabassum kabhi sirf tewari

magar ye sadaen to aati rahi hain

inhi se hayat-e-do-roza abad se mili hai

magar ye anokhi nida jis pe gahri thakan chha rahi hai

ye har ek sada ko miTane ki dhamki diye ja rahi hai

ab aankhon mein jumbish na chehre pe koi tabassum na tewari

faqat kan sunte chale ja rahe hain

ye ek gulistan hai hawa lahlahati hai kaliyan chaTakti hain

ghunche mahakte hain aur phul khilte hain khil khil ke murjha ke

girte hain ek farsh-e-maKHmal banate hain jis par

meri aarzuon ki pariyan ajab aan se yun rawan hain

ki jaise gulistan hi ek aaina hai

isi aaine se har ek shakl nikhri sanwar kar miTi aur miT hi gai phir na ubhri

ye parbat hai KHamosh sakin

kabhi koi chashma ubalte hue puchhta hai ki us ki chaTanon ke us par kya hai

magar mujh ko parbat ka daman hi kafi hai daman mein wadi hai wadi mein naddi

hai naddi mein bahti hui naw hi aaina hai

isi aaine mein har ek shakl nikhri magar ek pal mein jo miTne lagi hai to

phir na ubhri

ye sahra hai phaila hua KHushk be-barg sahra

bagule yahan tund bhuton ka aks-e-mojassam bane hain

magar main to dur ek peDon ke jhurmuT pe apni nigahen jamae hue hun

na ab koi sahra na parbat na koi gulistan

ab aankhon mein jumbish na chehre pe koi tabassum na tewari

faqat ek anokhi sada kah rahi hai ki tum ko bulate bulate mere dil pe

gahri thakan chha rahi hai

bulate bulate to koi na ab tak thaka hai na shayad thakega

to phir ye nida aaina hai faqat main thaka hun

na sahra na parbat na koi gulistan faqat ab samundar bulata hai mujh ko

ki har shai samundar se aai samundar mein ja kar milegi