samundar ki KHushbu

samundar kī ḳhushbū

kahīñ duur se aa rahī hai,

samundar kī bū se haiñ bojhal... nashīlī havā.eñ

havā.eñ

jo sāhil kī ḳhasta tamannā se Takrā rahī haiñ

havā.eñ purāne zamāne ke kuchh raaz dohrā rahī haiñ

yahāñ se zarā fāsle par nagar hai

jahāñ log baste haiñ

apnī ḳhamoshī meñ Duubī huī zindagī ko... sahārā diye

log rote haiñ... hañste haiñ

apne purāne gharoñ meñ

havā.eñ

purāne gharoñ kī muñDeroñ se Takrā rahī haiñ

purāne gharoñ kī chhatoñ meñ... hadoñ meñ

purāne parindoñ kī haiñ āshiyāne

purāne gharoñ ke makīnoñ ke

apne fasurda fasāne,

koī apne dil kā fasāna

parindoñ se kahtā nahīñ hai

nashīlī havāoñ kī dīvāngī koī sahtā nahīñ hai

samundar kī shorīda-ḳhū garm maujoñ pe bahtā nahīñ hai

samundar

nagar kī bahut tañg galiyoñ se hote hue

mere tan ke tapīda jazīre talak aa gayā hai

samundar... merī aañkh ke rauzan-e-yād se

ruuh ke dasht meñ jhāñktā hai

samundar... mire ḳhuun ke surḳh meñ maujzan

niiñd ke zard meñ na.ara-zan hai

samundar

mere ḳhvāb ke sabz par ḳhanda-zan hai

mire jism par... apnī ḳhvāhish kī bosīdgī kī ridā.eñ

mire jism par ḳhanda-zan haiñ... ye taaza nashīlī havā.eñ

azal kā samundar... mirī aañkh se bah rahā hai

abad ke samundar kā jaadū

mire dil se kuchh kah rahā hai!

samundar ki KHushbu

kahin dur se aa rahi hai,

samundar ki bu se hain bojhal nashili hawaen

hawaen

jo sahil ki KHasta tamanna se Takra rahi hain

hawaen purane zamane ke kuchh raaz dohra rahi hain

yahan se zara fasle par nagar hai

jahan log baste hain

apni KHamoshi mein Dubi hui zindagi ko sahaara diye

log rote hain hanste hain

apne purane gharon mein

hawaen

purane gharon ki munDeron se Takra rahi hain

purane gharon ki chhaton mein hadon mein

purane parindon ki hain aashiyane

purane gharon ke makinon ke

apne fasurda fasane,

koi apne dil ka fasana

parindon se kahta nahin hai

nashili hawaon ki diwangi koi sahta nahin hai

samundar ki shorida-KHu garm maujon pe bahta nahin hai

samundar

nagar ki bahut tang galiyon se hote hue

mere tan ke tapida jazire talak aa gaya hai

samundar meri aankh ke rauzan-e-yaad se

ruh ke dasht mein jhankta hai

samundar mere KHun ke surKH mein maujzan

nind ke zard mein nara-zan hai

samundar

mere KHwab ke sabz par KHanda-zan hai

mere jism par apni KHwahish ki bosidgi ki ridaen

mere jism par KHanda-zan hain ye taza nashili hawaen

azal ka samundar meri aankh se bah raha hai

abad ke samundar ka jadu

mere dil se kuchh kah raha hai!