sangam

prayāg pe bichhḌī huī bahneñ jo milī haiñ

paanī kī zamīñ par bhī to kaliyāñ sī khilī haiñ

kuchh gañgā kā ruknā

kuchh jamunā kā jhuknā

phir donoñ kā milnā

vo phuul se khilnā

kis shauq se iThlātī huī saath chalī haiñ

ye ishq-o-mohabbat ke nazzāre azalī haiñ

kahte haiñ ki jannat se bhī aa.ī hai bahan ek

go tīnoñ kā hī asl meñ ghar ek vatan hai

ghar jab se chhuTā thā

dil sard huā thā

vo koh se girnā

vo dasht meñ phirnā

rātoñ ko vo sunsān bayābān meñ chalnā

sahme hue tāroñ kā vo siine meñ machalnā

thā vo safar dasht meñ maidān meñ ban meñ

ḳhāmosh pahāḌoñ meñ gulistāñ meñ chaman meñ

jañgal se nikalnā

rukte hue chalnā

kuchh baḌh ke palaTnā

Dar Dar ke simaTnā

mar mar ke akele ye guzārā hai zamāna

jaise koī duniyā meñ na ho apnā yagāna

ḳhālī kabhī jaatī nahīñ be-lafz sadā.eñ

āḳhir ko asar kar ga.iiñ ḳhāmosh duā.eñ

jaagā hai muqaddar

prayāg pe aa kar

ab ġham na saheñge

tanhā na raheñge

prayāg pe bahnoñ ko milāyā hai ḳhudā ne

muddat meñ ye din aaj dikhāyā hai ḳhudā ne

kyā josh-e-mohabbat se baġhal-gīr huī haiñ

vāraftagī-e-shauq kī tasvīr huī haiñ

allāh re mohabbat

sarmāya-e-rāhat

ye kis ko ḳhabar thī

dil milte haiñ yuuñ bhī

hoñgī na judā hashr tak ab aise milī haiñ

ḳhush bahneñ haiñ yā paanī pe kaliyāñ sī khilī haiñ

prayag pe bichhDi hui bahnen jo mili hain

pani ki zamin par bhi to kaliyan si khili hain

kuchh ganga ka rukna

kuchh jamuna ka jhukna

phir donon ka milna

wo phul se khilna

kis shauq se iThlati hui sath chali hain

ye ishq-o-mohabbat ke nazzare azali hain

kahte hain ki jannat se bhi aai hai bahan ek

go tinon ka hi asl mein ghar ek watan hai

ghar jab se chhuTa tha

dil sard hua tha

wo koh se girna

wo dasht mein phirna

raaton ko wo sunsan bayaban mein chalna

sahme hue taron ka wo sine mein machalna

tha wo safar dasht mein maidan mein ban mein

KHamosh pahaDon mein gulistan mein chaman mein

jangal se nikalna

rukte hue chalna

kuchh baDh ke palaTna

Dar Dar ke simaTna

mar mar ke akele ye guzara hai zamana

jaise koi duniya mein na ho apna yagana

KHali kabhi jati nahin be-lafz sadaen

aaKHir ko asar kar gain KHamosh duaen

jaga hai muqaddar

prayag pe aa kar

ab gham na sahenge

tanha na rahenge

prayag pe bahnon ko milaya hai KHuda ne

muddat mein ye din aaj dikhaya hai KHuda ne

kya josh-e-mohabbat se baghal-gir hui hain

waraftagi-e-shauq ki taswir hui hain

allah re mohabbat

sarmaya-e-rahat

ye kis ko KHabar thi

dil milte hain yun bhi

hongi na juda hashr tak ab aise mili hain

KHush bahnen hain ya pani pe kaliyan si khili hain