sar-e-rahguzar ek manzar

qafas kā dar khulā ik nīm-jāñ kam-sin

parinda chand ḳhasta zā.ichoñ par raqs ke andāz meñ aage

baḌhā, phir choñch se apnā pasandīda

musavvar zā.icha us ne uThāyā aur apne hī

hidāyat-kār ke aage

adab se rakh diyā jhuk kar

hidāyat-kār garche nuur se thā bad-gumāñ mahrūm nā-ḳhvāñda

sar-e-sail-e-ravāñ ik barg-e-be-māya

navisht-e-baḳht ke asrār se vāqif thā vo shāyad

nazar ke rū-ba-rū us ne

matā-e-be-nihāyat ke fasāne se mujhe ḳhush-hāl kar Daalā

mujhe pāmāl kar Daalā

sabhī mauj-e-ziyā meñ the

sabhī ke chashm o dil meñ ek shola thā

sabhī ḳhāmosh gum-sum haiñ

yahāñ se kaun jā.egā

yahāñ par kaun aa.egā

parinda nīm-jāñ kam-sin

qafas meñ jā chukā kab kā

hidāyat-kār kī āñkhoñ meñ lauT aa.ī hai vīrānī

jo kal ḳhālī thā vo dast-e-talab hai aaj bhī ḳhālī

laboñ par lutf-e-andām-e-nihāñ kī an-sunī gaalī

qafas ka dar khula ek nim-jaan kam-sin

parinda chand KHasta zaichon par raqs ke andaz mein aage

baDha, phir chonch se apna pasandida

musawwar zaicha us ne uThaya aur apne hi

hidayat-kar ke aage

adab se rakh diya jhuk kar

hidayat-kar garche nur se tha bad-guman mahrum na-KHwanda

sar-e-sail-e-rawan ek barg-e-be-maya

nawisht-e-baKHt ke asrar se waqif tha wo shayad

nazar ke ru-ba-ru us ne

mata-e-be-nihayat ke fasane se mujhe KHush-haal kar Dala

mujhe pamal kar Dala

sabhi mauj-e-ziya mein the

sabhi ke chashm o dil mein ek shola tha

sabhi KHamosh gum-sum hain

yahan se kaun jaega

yahan par kaun aaega

parinda nim-jaan kam-sin

qafas mein ja chuka kab ka

hidayat-kar ki aankhon mein lauT aai hai virani

jo kal KHali tha wo dast-e-talab hai aaj bhi KHali

labon par lutf-e-andam-e-nihan ki an-suni gali