sar-e-tur

dil ko be-tāb rakhtī hai ik aarzū

kam hai ye vus.at-e-ālam-e-rañg-o-bū

le chalī hai kidhar phir na.ī justujū

tā-ba hadd-e-nazar uḌ ke jaate haiñ ham

vo jo haa.il the rāhoñ meñ shams o qamar

ham-safar un ko apnā banāte haiñ ham

hai zamīñ parda-e-lāla-o-nastaran

āsmāñ parda-e-kahkashāñ hai abhī

rāz-e-fitrat huā laakh ham par ayaañ

rāz-e-fitrat nihāñ kā nihāñ hai abhī

jis kī sadiyoñ udhar ham ne kī ibtidā

nā-tamām apnī vo dāstāñ hai abhī

manzileñ uḌ ga.iiñ ban ke gard-e-safar

rahguzāroñ hī meñ kārvāñ hai abhī

pī ke nākāmiyoñ kī sharāb-e-kuhan

apnā zauq-e-tajassus javāñ hai abhī

haath kaaTe ga.e jur.at-e-shauq par

ḳhūñ-chakāñ ho ke vo gul-fishāñ ho ga.e

hairatoñ ne lagā.ī jo mohr-e-sukūt

lab ḳhamoshī meñ jaadū bayāñ ho ga.e

rāste meñ jo kohsār aa.e to ham

aise taḌpe ki sail-e-ravāñ ho ga.e

haiñ azal se zamīñ ke kure par amiir

ho ke mahdūd ham be-karāñ ho ga.e

zuaq-e-parvāz bhī dil kī ik jast hai

ḳhaak se zīnat-e-āsmāñ ho ga.e

aql-chālāk ne dī hai aa kar ḳhabar

ik shabistāñ hai aivān-e-mahtāb meñ

muntazir haiñ nigārān-e-ātish-badan

jagmagātī fazāoñ kī mehrāb meñ

kitne dilkash hasīñ ḳhvāb bedār haiñ

maah o mirrīḳh kī chashm-e-be-ḳhvāb meñ

khīñch phir zulf-e-māshūq-e-nīl-gūñ

le le shole ko phir dast-e-betāb meñ

muzhda ho mah-jabīnān-e-aflāk ko

bazm-e-gītī kā sāhab nazar aa gayā

tahniyat husn ko be-naqābī kī do

dīda-var aa gayā parda-dār aa gayā

āsmāñ se girā thā jo kal TuuT kar

vo sitāra ba-dosh-e-qamar aa gayā

le ke paimāna-e-dard-e-dil haath meñ

mal ke chehre pe ḳhūn-e-jigar aa gayā

bazm-e-sayyārgān-e-falak-sair meñ

ik hunar-mand sayyāra-gar aa gayā

shauq kī had magar chāñd tak to nahīñ

hai abhī rif.at-e-āsmāñ aur bhī

hai surayyā ke pīchhe surayyā ravāñ

kahkashāñ se pare kahkashāñ aur bhī

jhāñktī haiñ fazāoñ ke pechāk se

rañg aur nuur kī vādiyāñ aur bhī

aur bhī manzileñ, aur bhī mushkileñ

haiñ abhī ishq ke imtihāñ aur bhī

aaj dast-e-junūñ par hai sham-e-ḳhirad

do jahāñ jis ke shole se ma.amūr haiñ

le ke aa.eñ payām-e-tulū-e-sahar

jitne sūraj ḳhalāoñ meñ mastūr haiñ

kah do barq-e-tajallī se ho jalva-gar

aaj muusā nahīñ ham sar-e-tūr haiñ

dil ko be-tab rakhti hai ek aarzu

kam hai ye wusat-e-alam-e-rang-o-bu

le chali hai kidhar phir nai justuju

ta-ba hadd-e-nazar uD ke jate hain hum

wo jo hail the rahon mein shams o qamar

ham-safar un ko apna banate hain hum

hai zamin parda-e-lala-o-nastaran

aasman parda-e-kahkashan hai abhi

raaz-e-fitrat hua lakh hum par ayan

raaz-e-fitrat nihan ka nihan hai abhi

jis ki sadiyon udhar hum ne ki ibtida

na-tamam apni wo dastan hai abhi

manzilen uD gain ban ke gard-e-safar

rahguzaron hi mein karwan hai abhi

pi ke nakaamiyon ki sharab-e-kuhan

apna zauq-e-tajassus jawan hai abhi

hath kaTe gae jurat-e-shauq par

KHun-chakan ho ke wo gul-fishan ho gae

hairaton ne lagai jo mohr-e-sukut

lab KHamoshi mein jadu bayan ho gae

raste mein jo kohsar aae to hum

aise taDpe ki sail-e-rawan ho gae

hain azal se zamin ke kure par amir

ho ke mahdud hum be-karan ho gae

zuaq-e-parwaz bhi dil ki ek jast hai

KHak se zinat-e-asman ho gae

aql-chaalak ne di hai aa kar KHabar

ek shabistan hai aiwan-e-mahtab mein

muntazir hain nigaran-e-atish-badan

jagmagati fazaon ki mehrab mein

kitne dilkash hasin KHwab bedar hain

mah o mirriKH ki chashm-e-be-KHwab mein

khinch phir zulf-e-mashuq-e-nil-gun

le le shole ko phir dast-e-betab mein

muzhda ho mah-jabinan-e-aflak ko

bazm-e-giti ka sahab nazar aa gaya

tahniyat husn ko be-naqabi ki do

dida-war aa gaya parda-dar aa gaya

aasman se gira tha jo kal TuT kar

wo sitara ba-dosh-e-qamar aa gaya

le ke paimana-e-dard-e-dil hath mein

mal ke chehre pe KHun-e-jigar aa gaya

bazm-e-sayyargan-e-falak-sair mein

ek hunar-mand sayyara-gar aa gaya

shauq ki had magar chand tak to nahin

hai abhi rifat-e-asman aur bhi

hai surayya ke pichhe surayya rawan

kahkashan se pare kahkashan aur bhi

jhankti hain fazaon ke pechaak se

rang aur nur ki wadiyan aur bhi

aur bhi manzilen, aur bhi mushkilen

hain abhi ishq ke imtihan aur bhi

aaj dast-e-junun par hai sham-e-KHirad

do jahan jis ke shole se mamur hain

le ke aaen payam-e-tulu-e-sahar

jitne suraj KHalaon mein mastur hain

kah do barq-e-tajalli se ho jalwa-gar

aaj musa nahin hum sar-e-tur hain