jaDe ki bahaaren

jab maah aghan kā Dhaltā ho tab dekh bahāreñ jaaḌe kī

aur hañs hañs puus sambhaltā ho tab dekh bahāreñ jaaḌe kī

din jaldī jaldī chaltā ho tab dekh bahāreñ jaaḌe kī

aur paalā barf pighaltā ho tab dekh bahāreñ jaaḌe kī

chillā ġham Thoñk uchhaltā ho tab dekh bahāreñ jaaḌe kī

tan Thokar maar pichhāḌā ho aur dil se hotī ho kushtī sī

thar-thar kā zor ukhāḌā ho bajtī ho sab kī battīsī

ho shor phaphū hū-hū kā aur dhuum ho sī-sī sī-sī kī

kalle pe kallā lag lag kar chaltī ho muñh meñ chakkī sī

har daañt chane se daltā ho tab dekh bahāreñ jaaḌe kī

har ek makāñ meñ sardī ne aa bāñdh diyā ho ye chakkar

jo har dam kap-kap hotī ho har aan kaḌākaḌ aur thar-thar

paiThī ho sardī rag rag meñ aur barf pighaltā ho patthar

jhaḌ-bāñdh mahāvaT paḌtī ho aur tis par lahreñ le le kar

sannāTā baav kā chaltā ho tab dekh bahāreñ jaaḌe kī

har chaar taraf se sardī ho aur sehn khulā ho koThe kā

aur tan meñ niimā shabnam kā ho jis meñ ḳhas kā itr lagā

chhiḌkāv huā ho paanī kā aur ḳhuub palañg bhī ho bhīgā

hāthoñ meñ piyāla sharbat kā ho aage ik farrāsh khaḌā

farrāsh bhī pañkhā jhaltā ho tab dekh bahāreñ jaaḌe kī

jab aisī sardī ho ai dil tab roz maze kī ghāteñ hoñ

kuchh narm bichhaune maḳhmal ke kuchh aish kī lambī rāteñ hoñ

mahbūb gale se lipTā ho aur kuhnī, chuTkī, lāteñ hoñ

kuchh bose milte jaate hoñ kuchh mīThī mīThī bāteñ hoñ

dil aish-o-tarab meñ paltā ho tab dekh bahāreñ jaaḌe kī

ho farsh bichhā ġhālīchoñ kā aur parde chhoTe hoñ aa kar

ik garm añgīThī jaltī ho aur sham.a ho raushan aur tis par

vo dilbar, shoḳh, parī, chanchal, hai dhuum machī jis kī ghar ghar

resham kī narm nihālī par sau nāz-o-adā se hañs hañs kar

pahlū ke biich machaltā ho tab dekh bahāreñ jaaḌe kī

tarkīb banī ho majlis kī aur kāfir nāchne vaale hoñ

muñh un ke chāñd ke TukḌe hoñ tan un ke ruuī ke gaale hoñ

poshākeñ nāzuk rañgoñ kī aur oḌhe shaal do-shāle hoñ

kuchh naach aur rañg kī dhūmeñ hoñ aish meñ ham matvāle hoñ

piyāle par pyāla chaltā ho tab dekh bahāreñ jaaḌe kī

har ek makāñ ho ḳhalvat kā aur aish kī sab tayyārī ho

vo jaan ki jis se jī ġhash ho sau naaz se aa jhankārī ho

dil dekh 'nazīr' us kī chhab ko har aan adā par vaarī ho

sab aish muhayyā ho aa kar jis jis armān kī baaī ho

jab sab armān nikaltā ho tab dekh bahāreñ jaaḌe kī

jab mah aghan ka Dhalta ho tab dekh bahaaren jaDe ki

aur hans hans pus sambhalta ho tab dekh bahaaren jaDe ki

din jaldi jaldi chalta ho tab dekh bahaaren jaDe ki

aur pala barf pighalta ho tab dekh bahaaren jaDe ki

chilla gham Thonk uchhalta ho tab dekh bahaaren jaDe ki

tan Thokar mar pichhaDa ho aur dil se hoti ho kushti si

thar-thar ka zor ukhaDa ho bajti ho sab ki battisi

ho shor phaphu hu-hu ka aur dhum ho si-si si-si ki

kalle pe kalla lag lag kar chalti ho munh mein chakki si

har dant chane se dalta ho tab dekh bahaaren jaDe ki

har ek makan mein sardi ne aa bandh diya ho ye chakkar

jo har dam kap-kap hoti ho har aan kaDakaD aur thar-thar

paiThi ho sardi rag rag mein aur barf pighalta ho patthar

jhaD-bandh mahawaT paDti ho aur tis par lahren le le kar

sannaTa baw ka chalta ho tab dekh bahaaren jaDe ki

har chaar taraf se sardi ho aur sehn khula ho koThe ka

aur tan mein nima shabnam ka ho jis mein KHas ka itr laga

chhiDkaw hua ho pani ka aur KHub palang bhi ho bhiga

hathon mein piyala sharbat ka ho aage ek farrash khaDa

farrash bhi pankha jhalta ho tab dekh bahaaren jaDe ki

jab aisi sardi ho ai dil tab roz maze ki ghaten hon

kuchh narm bichhaune maKHmal ke kuchh aish ki lambi raaten hon

mahbub gale se lipTa ho aur kuhni, chuTki, laten hon

kuchh bose milte jate hon kuchh miThi miThi baaten hon

dil aish-o-tarab mein palta ho tab dekh bahaaren jaDe ki

ho farsh bichha ghaalichon ka aur parde chhoTe hon aa kar

ek garm angiThi jalti ho aur shama ho raushan aur tis par

wo dilbar, shoKH, pari, chanchal, hai dhum machi jis ki ghar ghar

resham ki narm nihaali par sau naz-o-ada se hans hans kar

pahlu ke bich machalta ho tab dekh bahaaren jaDe ki

tarkib bani ho majlis ki aur kafir nachne wale hon

munh un ke chand ke TukDe hon tan un ke rui ke gale hon

poshaken nazuk rangon ki aur oDhe shaal do-shaale hon

kuchh nach aur rang ki dhumen hon aish mein hum matwale hon

piyale par pyala chalta ho tab dekh bahaaren jaDe ki

har ek makan ho KHalwat ka aur aish ki sab tayyari ho

wo jaan ki jis se ji ghash ho sau naz se aa jhankari ho

dil dekh 'nazir' us ki chhab ko har aan ada par wari ho

sab aish muhayya ho aa kar jis jis arman ki bai ho

jab sab arman nikalta ho tab dekh bahaaren jaDe ki