sarhad-e-hindostan

hind ke bāñke sipāhī azm ke koh-e-girāñ

zindābād ai faḳhr-e-mashriq nāzish-e-hindostāñ

jaan de kar mol lete haiñ hayāt-e-jāvidāñ

sarfaroshoñ ke liye to naam kī haiñ saḳhtiyāñ

jārhiyyat chiin kī ab ho ga.ī sab par ayaañ

saarī duniyā kah uThī hai dushman-e-amn-o-amāñ

chal ke ab laddaḳh-o-nefā se nikālo chiin ko

ġhasb karnā chāhtā hai sarhad-e-hindostāñ

azm-o-istiqlāl ke jauhar dikhānā haiñ tumheñ

ahd-e-māzī kī zarā dohrā do phir se dāstāñ

sar-ba-kaf maidāñ meñ aao kāmyābī ke liye

baat vaalo aa gayā hai sar pe vaqt-e-imtihāñ

dushmanoñ kī pesh-qadmī aarzī hai dekhnā

jāvedānī kāmyābī pā.egā hindostāñ

chuTkiyāñ lene lage haiñ phuul ke pahlū meñ ḳhaar

ham-nashīñ dushman bane ye vaqt kī nairangiyāñ

qāfile vāloñ ko manzil kā pata mil jā.egā

jabki ai 'takmīl' nehru haiñ amīr-e-kārvāñ

hind ke banke sipahi azm ke koh-e-giran

zindabaad ai faKHr-e-mashriq nazish-e-hindostan

jaan de kar mol lete hain hayat-e-jawidan

sarfaroshon ke liye to nam ki hain saKHtiyan

jarhiyyat chin ki ab ho gai sab par ayan

sari duniya kah uThi hai dushman-e-amn-o-aman

chal ke ab laddaKH-o-nefa se nikalo chin ko

ghasb karna chahta hai sarhad-e-hindostan

azm-o-istiqlal ke jauhar dikhana hain tumhein

ahd-e-mazi ki zara dohra do phir se dastan

sar-ba-kaf maidan mein aao kaamyabi ke liye

baat walo aa gaya hai sar pe waqt-e-imtihan

dushmanon ki pesh-qadmi aarzi hai dekhna

jawedani kaamyabi paega hindostan

chuTkiyan lene lage hain phul ke pahlu mein KHar

ham-nashin dushman bane ye waqt ki nairangiyan

qafile walon ko manzil ka pata mil jaega

jabki ai 'takmil' nehru hain amir-e-karwan