sat-rangi qaus-e-quzah ke nam

maiñ ki ik jannat-e-arzī se chalā aayā huuñ

biitī yādoñ kī mahak dil meñ chhupā laayā huuñ

jis jagah kausar-o-tasnīm kī nahreñ thiiñ ravāñ

jis jagah apnī tamannāoñ kī duniyā thī javāñ

nūr-e-aiman thā surayyā kī nigāhoñ meñ jahāñ

shāḳh-e-nasrīn thī farhīn kī bāñhoñ meñ jahāñ

jis jagah farhat-o-nuz.hat kī havā chaltī thī

ban ke taz.īn-e-dar-o-bām sabā chaltī thī

lab-e-ḳhāmosh se phūTā thā tarannum jis jā

mere hoñToñ ne bhī sīkhā thā tabassum jis jā

nīlgūñ āñkhoñ se Tapke hue tāroñ kī kiran

chand biite hue lamhāt kī yādoñ kī jalan

maiñ usī gum-shuda jannat se churā laayā huuñ

maiñ ki ik jannat-e-arzī se chalā aayā huuñ

main ki ek jannat-e-arzi se chala aaya hun

biti yaadon ki mahak dil mein chhupa laya hun

jis jagah kausar-o-tasnim ki nahren thin rawan

jis jagah apni tamannaon ki duniya thi jawan

nur-e-aiman tha surayya ki nigahon mein jahan

shaKH-e-nasrin thi farhin ki banhon mein jahan

jis jagah farhat-o-nuzhat ki hawa chalti thi

ban ke tazin-e-dar-o-baam saba chalti thi

lab-e-KHamosh se phuTa tha tarannum jis ja

mere honTon ne bhi sikha tha tabassum jis ja

nilgun aankhon se Tapke hue taron ki kiran

chand bite hue lamhat ki yaadon ki jalan

main usi gum-shuda jannat se chura laya hun

main ki ek jannat-e-arzi se chala aaya hun