sati

ai satī ai jalva-gāh-e-shola-e-tanvīr-e-husn

pāk-dāmānī kā naqsha hai tirī tasvīr-e-husn

ye tan-e-nāzuk tirā ye shola-hā-e-ātshīñ

ye chitā kī ātish-e-sozāñ ye jism-e-nāznīñ

sā.iqa hai barq kā tere dil-e-muztar kī aag

phūñk detī hai tujhe soz-e-ġham-e-shauhar kī aag

ḳhaak ho kar bhī tire dāġh-e-jigar bujhte nahīñ

aah terī raakh ke barsoñ sharar bujhte nahīñ

hind ko hai naaz terī himmat-e-mardāna par

tū charāġh-e-kushta hai ḳhākistar-e-parvāna par

aag meñ hai tū sapind-e-shauq jalne ke liye

sham-e-mātam hai shab-e-ġham meñ pighalne ke liye

garmi-e-hañgāma-e-mahshar tirī mahfil meñ hai

sard jo hotī nahīñ vo aag tere dil meñ hai

kab gavārā aah hai soz-e-ġham-e-shauhar tujhe

hai har ik tār-e-nafas ik shola-e-muztar tujhe

uf rī shauhar kī chitā par shola-afrozī tirī

jīte-jī soz-e-mohabbat meñ jigar-sozī tirī

jāñ-gudāzī kī adā ye sham-e-mahfil meñ kahāñ

garmi-e-soz-e-vafā ye sham-e-mahfil meñ kahāñ

vo chitā kī ātish-e-jāñ-soz vo dūd-e-siyāh

shauhar-e-murda kā sar vo zānū-e-nāzuk pe aah

aag ke vo haa.e shole aur vo mukhḌā chāñd sā

lab pe kam kam shoḳhi-e-barq-e-tabassum kī adā

halkā phulkā jism-e-nāzuk par dupaTTa surḳh surḳh

vasl-e-rūhānī kī shādī se vo chehra surḳh surḳh

ālam-e-dūd-e-siyah vo zulf-e-ambar-fām meñ

dauḌne vaale vo shole halqa-hā-e-dām meñ

ātish-e-sozāñ meñ bhī vo aah shauhar kā ḳhayāl

aur vo dil meñ garmi-e-hañgāma-e-shauq-e-visāl

jal ke soz-e-iztirāb-e-shauq meñ parvāna-vār

ḳhuld meñ shauhar se honā uf vo ḳhush ḳhush ham-kanār

Daal denā vo gale meñ hañs ke bāñheñ pyaar se

dil lubhā lenā adā-e-sheva-e-guftār se

halkī halkī chāndnī kaifiyat-e-gul-gasht-e-bāġh

vo lab-e-jū aah husn o ishq ke do shab charāġh

tujh pe ai nāz-āfrīñ shauhar-parastī ḳhatm hai

ik sharār-e-ārzū meñ terī hastī ḳhatm hai

ai sati ai jalwa-gah-e-shola-e-tanwir-e-husn

pak-damani ka naqsha hai teri taswir-e-husn

ye tan-e-nazuk tera ye shola-ha-e-atshin

ye chita ki aatish-e-sozan ye jism-e-naznin

saiqa hai barq ka tere dil-e-muztar ki aag

phunk deti hai tujhe soz-e-gham-e-shauhar ki aag

KHak ho kar bhi tere dagh-e-jigar bujhte nahin

aah teri rakh ke barson sharar bujhte nahin

hind ko hai naz teri himmat-e-mardana par

tu charagh-e-kushta hai KHakistar-e-parwana par

aag mein hai tu sapind-e-shauq jalne ke liye

sham-e-matam hai shab-e-gham mein pighalne ke liye

garmi-e-hangama-e-mahshar teri mahfil mein hai

sard jo hoti nahin wo aag tere dil mein hai

kab gawara aah hai soz-e-gham-e-shauhar tujhe

hai har ek tar-e-nafas ek shola-e-muztar tujhe

uf ri shauhar ki chita par shola-afrozi teri

jite-ji soz-e-mohabbat mein jigar-sozi teri

jaan-gudazi ki ada ye sham-e-mahfil mein kahan

garmi-e-soz-e-wafa ye sham-e-mahfil mein kahan

wo chita ki aatish-e-jaan-soz wo dud-e-siyah

shauhar-e-murda ka sar wo zanu-e-nazuk pe aah

aag ke wo hae shole aur wo mukhDa chand sa

lab pe kam kam shoKHi-e-barq-e-tabassum ki ada

halka phulka jism-e-nazuk par dupaTTa surKH surKH

wasl-e-ruhani ki shadi se wo chehra surKH surKH

aalam-e-dud-e-siyah wo zulf-e-ambar-fam mein

dauDne wale wo shole halqa-ha-e-dam mein

aatish-e-sozan mein bhi wo aah shauhar ka KHayal

aur wo dil mein garmi-e-hangama-e-shauq-e-visal

jal ke soz-e-iztirab-e-shauq mein parwana-war

KHuld mein shauhar se hona uf wo KHush KHush ham-kanar

Dal dena wo gale mein hans ke banhen pyar se

dil lubha lena ada-e-shewa-e-guftar se

halki halki chandni kaifiyat-e-gul-gasht-e-bagh

wo lab-e-ju aah husn o ishq ke do shab charagh

tujh pe ai naz-afrin shauhar-parasti KHatm hai

ek sharar-e-arzu mein teri hasti KHatm hai