sattar maon ka pyar

kitāboñ kā ziina banā kar

machānī se maiñ ne miThā.ī churā.ī to

ghar meñ kisī ko bhī ġhussa na aayā

ye kam-sin zehānat kī tāsīr thī

yā sharārat kī shīrīñ shakar-qandiyoñ jaisī umroñ kī lazzat

abhī tak vo ḳhush-zā.eqa vāqi.a

jab rag-e-jāñ meñ ghultā hai

bachpan ke bāġhāt kī titliyāñ

phuul ban kar barastī haiñ

pathrīlī umroñ ke din raat kī

zard kaalī musībat kā ġham bhuul kar

muskurāhaT kī mīThī phuvāreñ

bayābāñ ko jal-thal banātī haiñ gaatī haiñ

ek do tiin

allāh miyāñ kī zamīn

chaar pāñch chhe saat

saare mil kar khā.eñ bhaat

aaTh nau das paanī mīThā ras

paanī kī lahroñ pe hachkole khātī huī

kāġhazī-umr kī naav

karvaT badal kar ulaT detī hai ḳhvāb saare

kitāboñ pe girte hue āñsuoñ se

siyāhī ke dariyā hī bante haiñ

dariyā samundar banāte haiñ

saare samundar siyāhī qalam ban ga.iiñ saarī shāḳheñ

qasam uñgliyoñ kī

mohabbat bharā ḳhat mire aur tire darmiyāñ tiir hai

maiñ likkhūñ aur likhtā rahūñ tā-qayāmat

mohabbat kī nazmeñ

magar jāniyāñ in kitāboñ ko ziina banā kar

ka.ī baar maiñ ne

tire āsmānoñ pe jā kar

tujhe DhūñD laane kī nākām koshish meñ

aañsū bahā.e

siyāhī ke dariyā banā.e

kahāñ hai tū ḳhud apnī shīrīñ sadā se

mirī tīra-baḳhtī meñ

shubhrāt kī misriyāñ ghol de

maañ to nārāz hai

ab ka.ī roz se boltī bhī nahīñ

kitabon ka zina bana kar

machani se main ne miThai churai to

ghar mein kisi ko bhi ghussa na aaya

ye kam-sin zehanat ki tasir thi

ya shararat ki shirin shakar-qandiyon jaisi umron ki lazzat

abhi tak wo KHush-zaeqa waqia

jab rag-e-jaan mein ghulta hai

bachpan ke baghat ki titliyan

phul ban kar barasti hain

pathrili umron ke din raat ki

zard kali musibat ka gham bhul kar

muskurahaT ki miThi phuwaren

bayaban ko jal-thal banati hain gati hain

ek do tin

allah miyan ki zamin

chaar panch chhe sat

sare mil kar khaen bhat

aaTh nau das pani miTha ras

pani ki lahron pe hachkole khati hui

kaghazi-umr ki naw

karwaT badal kar ulaT deti hai KHwab sare

kitabon pe girte hue aansuon se

siyahi ke dariya hi bante hain

dariya samundar banate hain

sare samundar siyahi qalam ban gain sari shaKHen

qasam ungliyon ki

mohabbat bhara KHat mere aur tere darmiyan tir hai

main likkhun aur likhta rahun ta-qayamat

mohabbat ki nazmen

magar jaaniyan in kitabon ko zina bana kar

kai bar main ne

tere aasmanon pe ja kar

tujhe DhunD lane ki nakaam koshish mein

aansu bahae

siyahi ke dariya banae

kahan hai tu KHud apni shirin sada se

meri tira-baKHti mein

shubhraat ki misriyan ghol de

man to naraaz hai

ab kai roz se bolti bhi nahin