sawal

ham apne ḳhvāb-e-ḳhush-fahmī se uTThe

bahut shādāñ-o-farhāñ

chale duniyā kī jānib mol karne ko

hamārī jeb meñ mehr-o-vafā iḳhlās aur sachchā.ī hai

lekin

yahāñ bāzār meñ sab log kahte haiñ

badal kar rah ga.ī hai ab currency is zamāne kī

tumhāre paas to jo kuchh bhī hai

be-kār raddī hai

ki ab vaq.at nahīñ hai koī jis kī

yahāñ to ab faqat

makr-o-fareb aur jhuuT kā sikka chalegā

agar ye paas hai

to saarī duniyā hai tumhārī

hamārī sādgī par

ik zamāna hañs rahā hai

jise dekho ta.ajjub se yahī vo pūchhtā hai

kahāñ tum ab talak so.e hue the

ki duniyā is qadar tabdīl hone kī ḳhabar tum tak nahīñ pahuñchī

nahīñ ma.alūm ye kyā mājrā hai

vagarna ham to sunte aa.e the ab tak

ki jo ik arsa mahv-e-ḳhvāb rahte haiñ

kisī behtar zamāne meñ uThā karte haiñ

lekin

hamāre saath ye kyā ho gayā hai

hum apne KHwab-e-KHush-fahmi se uTThe

bahut shadan-o-farhan

chale duniya ki jaanib mol karne ko

hamari jeb mein mehr-o-wafa iKHlas aur sachchai hai

lekin

yahan bazar mein sab log kahte hain

badal kar rah gai hai ab currency is zamane ki

tumhaare pas to jo kuchh bhi hai

be-kar raddi hai

ki ab waqat nahin hai koi jis ki

yahan to ab faqat

makr-o-fareb aur jhuT ka sikka chalega

agar ye pas hai

to sari duniya hai tumhaari

hamari sadgi par

ek zamana hans raha hai

jise dekho tajjub se yahi wo puchhta hai

kahan tum ab talak soe hue the

ki duniya is qadar tabdil hone ki KHabar tum tak nahin pahunchi

nahin malum ye kya majra hai

wagarna hum to sunte aae the ab tak

ki jo ek arsa mahw-e-KHwab rahte hain

kisi behtar zamane mein uTha karte hain

lekin

hamare sath ye kya ho gaya hai