saza

bhuul jaanā unheñ āsān hai ai dil

tū ne pahle bhī ka.ī baar qasam khaa.ī hai

dard jab had se baḌhā zabt kā yaarā na rahā

un kī ek ek adā yaad mujhe aa.ī hai

vo tabassum meñ nihāñ tanz ke mīThe nashtar

vo takallum meñ taġhāful ko chhupāne kī adā

ruk ke har lamha na.ī tarah se āġhāz-e-sitam

jaise kuchh kho ke kisī chiiz ko paane kī adā

merī ḳhāmoshī pe bebāk-nigāhī un kī

jazba-e-shauq ko kuchh aur baḌhāne kī adā

vo musalsal mirī bātoñ pe tavajjoh kī nazar

ruḳh pe machlī huī zulfoñ ko haTāne kī adā

mere ash.ār ko sunte hī vo āñkhoñ meñ ġhurūr

mujh ko har tarah se dīvāna banāne kī adā

be-ḳhudī dekh ke merī vahī begāna-ravī

paas aa aa ke bahut duur vo jaane kī adā

ruḳhsatī lamhoñ meñ hoñToñ pe duāoñ kā gumāñ

dar pe ruk kar mirī ḳhātir se vo jaane kī adā

aaj rah rah ke taḌaptā huuñ na.ī baat hai kyā

dil ne kyuuñ tark-e-mohabbat kī qasam khaa.ī hai

vo sitam laakh kareñ un kā to sheva hai yahī

ishq kī tark-e-mohabbat meñ bhī rusvā.ī hai

ab to jalte hue jiinā hī paḌegā ai dil

''tū ne ḳhud apne kiye kī ye sazā paa.ī hai''

bhul jaana unhen aasan hai ai dil

tu ne pahle bhi kai bar qasam khai hai

dard jab had se baDha zabt ka yara na raha

un ki ek ek ada yaad mujhe aai hai

wo tabassum mein nihan tanz ke miThe nashtar

wo takallum mein taghaful ko chhupane ki ada

ruk ke har lamha nai tarah se aaghaz-e-sitam

jaise kuchh kho ke kisi chiz ko pane ki ada

meri KHamoshi pe bebak-nigahi un ki

jazba-e-shauq ko kuchh aur baDhane ki ada

wo musalsal meri baaton pe tawajjoh ki nazar

ruKH pe machli hui zulfon ko haTane ki ada

mere ashaar ko sunte hi wo aankhon mein ghurur

mujh ko har tarah se diwana banane ki ada

be-KHudi dekh ke meri wahi begana-rawi

pas aa aa ke bahut dur wo jaane ki ada

ruKHsati lamhon mein honTon pe duaon ka guman

dar pe ruk kar meri KHatir se wo jaane ki ada

aaj rah rah ke taDapta hun nai baat hai kya

dil ne kyun tark-e-mohabbat ki qasam khai hai

wo sitam lakh karen un ka to shewa hai yahi

ishq ki tark-e-mohabbat mein bhi ruswai hai

ab to jalte hue jina hi paDega ai dil

tu ne KHud apne kiye ki ye saza pai hai