selfi

hijr ke be-sadā jazīre par

kunj-e-tanhā.ī meñ koī laḌkī

ḳhāl-o-ḳhad par lagā ke aas kā rañg

chashm-o-lab par sajā ke dil kī umañg

āñkhoñ āñkhoñ meñ muskurātī hai

shaam kī surma.ī udāsī meñ

apnī tasvīr ḳhud banātī hai

adh-khule hoñT nīm-vā āñkheñ

be-navā hoñT be-sadā āñkheñ

aisī ḳhāmoshī aisī tanhā.ī

ḳhud tamāshā hai ḳhud tamāshā.ī

ḳhud hī tasvīr ḳhud musavvir hai

ḳhud ġhazal aur ḳhud hī shā.er hai

sochtī hai ki jis ke hijr meñ maiñ

sham.a sī sub.h-o-shām jaltī huuñ

mom sī raat din pighaltī huuñ

kaash vo merī raushnī dekhe

merī āñkhoñ kī an-kahī samjhe

mere tan-man kī bebasī dekhe

jitnī shiddat se ḳhud ko dekhtī huuñ

kaash vo bhī mujhe kabhī dekhe

hijr ke be-sada jazire par

kunj-e-tanhai mein koi laDki

KHal-o-KHad par laga ke aas ka rang

chashm-o-lab par saja ke dil ki umang

aankhon aankhon mein muskuraati hai

sham ki surmai udasi mein

apni taswir KHud banati hai

adh-khule honT nim-wa aankhen

be-nawa honT be-sada aankhen

aisi KHamoshi aisi tanhai

KHud tamasha hai KHud tamashai

KHud hi taswir KHud musawwir hai

KHud ghazal aur KHud hi shaer hai

sochti hai ki jis ke hijr mein main

shama si subh-o-sham jalti hun

mom si raat din pighalti hun

kash wo meri raushni dekhe

meri aankhon ki an-kahi samjhe

mere tan-man ki bebasi dekhe

jitni shiddat se KHud ko dekhti hun

kash wo bhi mujhe kabhi dekhe