selfi

narcissus ke pahlū meñ baiThe hue

aks apnā hī tālāb meñ dekh kar

kitnī sadiyoñ se apnī hī ulfat meñ gum

ḳhud-pasandī ke maare hue log the

ḳhud-numā.ī ke zer-e-asar aa ga.e

ā.īne kā fusūñ is qadar baḌh gayā

ḳhud ko tasvīr karne kī ḳhvāhish uThī

apne hāthoñ meñ apnī hī āñkheñ liye

muḳhtalif zāviyoñ se nazar ḳhud pe kī

be-yaqīñ ho ga.e

ḳhud-farebī meñ mad.hosh hote hue

iztirāb nazaryoñ maraz ban gayā

ik vabā kī tarah phailtā hī gayā

nafsiyātī girah jab ulajhne lagī

apnī tash.hīr kā sar meñ saudā liye

aap apnā tamāsha lagāyā gayā

aur dikhāve ke be-sūd qirtās par

naqsh-dar-naqsh ḳhud ko miTāyā gayā

ruup bahrūp sūrat meñ laayā gayā

ḳhāl-o-ḳhad gum hue

shaḳhsiyat ke sabhī rañg uḌte ga.e

aur be-chehragī aks hone lagī

narcissus ke pahlu mein baiThe hue

aks apna hi talab mein dekh kar

kitni sadiyon se apni hi ulfat mein gum

KHud-pasandi ke mare hue log the

KHud-numai ke zer-e-asar aa gae

aaine ka fusun is qadar baDh gaya

KHud ko taswir karne ki KHwahish uThi

apne hathon mein apni hi aankhen liye

muKHtalif zawiyon se nazar KHud pe ki

be-yaqin ho gae

KHud-farebi mein madhosh hote hue

iztirab nazaryon maraz ban gaya

ek waba ki tarah phailta hi gaya

nafsiyati girah jab ulajhne lagi

apni tashhir ka sar mein sauda liye

aap apna tamasha lagaya gaya

aur dikhawe ke be-sud qirtas par

naqsh-dar-naqsh KHud ko miTaya gaya

rup bahrup surat mein laya gaya

KHal-o-KHad gum hue

shaKHsiyat ke sabhi rang uDte gae

aur be-chehragi aks hone lagi