shair ki tamannaen

agar ai sham'-e-dil jalnā hī thā tujh ko to jalnā thā

kisī bekas kī turbat par charāġh-e-nīm-jāñ ho kar

ye hasrat thī ki maujoñ ke talātum meñ bahā jaatā

maiñ apnī kashtī-e-be-bādbāñ kā pāsbāñ ho kar

batātā hālat-e-raftār-e-shab sahrā-nashīnoñ ko

nujūm-e-charḳh ban kar kārvāñ-dar-kārvāñ ho kar

thake-māñde musāfir ko sulā detā lab-e-dariyā

havā-e-sarv ban kar mauja-e-‘ambar-fashāñ ho kar

guzar jaatā fuġhāñ kartā huā sunsān vaadī se

fazāoñ ko jagā detā darā-e-kārvāñ ho kar

umīd-o-bīm ke jhagḌe miTā detā zamāne se

ḳhudī kā devtā ban kar ḳhudā kā tarjumāñ ho kar

fareb-e-husn detā dīda-e-kor-e-tamanna ko

nigāh-e-dil-nashīñ ban kar adā-e-dilsitāñ ho kar

kisī kī aarzū karnī hī thī to 'umr bhar kartā

javānī meñ havas ban kar buḌhāpe meñ javāñ ho kar

taraqqī munhasir 'isyāñ pe hai maqsūd-e-fitrat kī

taḌaptā sīna-hā-e-shauq meñ rāz-e-ziyāñ ho kar

ye hasrat thī ki ‘ālamgīr hotī raushnī dil kī

ye hasrat thī ki chhā jaatā zamīñ par āsmāñ ho kar

magar kyā kījiye jab faisla ye hai mashiyyat kā

ki maiñ fitrat kī āñkhoñ se girūñ ashk-e-ravāñ ho kar

agar ai sham'-e-dil jalna hi tha tujh ko to jalna tha

kisi bekas ki turbat par charagh-e-nim-jaan ho kar

ye hasrat thi ki maujon ke talatum mein baha jata

main apni kashti-e-be-baadban ka pasban ho kar

batata haalat-e-raftar-e-shab sahra-nashinon ko

nujum-e-charKH ban kar karwan-dar-karwan ho kar

thake-mande musafir ko sula deta lab-e-dariya

hawa-e-sarw ban kar mauja-e-‘ambar-fashan ho kar

guzar jata fughan karta hua sunsan wadi se

fazaon ko jaga deta dara-e-karwan ho kar

umid-o-bim ke jhagDe miTa deta zamane se

KHudi ka dewta ban kar KHuda ka tarjuman ho kar

fareb-e-husn deta dida-e-kor-e-tamanna ko

nigah-e-dil-nashin ban kar ada-e-dilsitan ho kar

kisi ki aarzu karni hi thi to 'umr bhar karta

jawani mein hawas ban kar buDhape mein jawan ho kar

taraqqi munhasir 'isyan pe hai maqsud-e-fitrat ki

taDapta sina-ha-e-shauq mein raaz-e-ziyan ho kar

ye hasrat thi ki ‘alamgir hoti raushni dil ki

ye hasrat thi ki chha jata zamin par aasman ho kar

magar kya kijiye jab faisla ye hai mashiyyat ka

ki main fitrat ki aankhon se girun ashk-e-rawan ho kar