shaer ki tamanna

agar is gulshan-e-hastī meñ honā hī muqaddar thā

to maiñ ġhunchoñ kī muTThī meñ dil-e-bulbul huā hotā

gunāhoñ meñ zarar hotā, duāoñ meñ asar hotā

mohabbat kī nazar hotā, hasīnoñ kī adā hotā

faroġh-e-chehra-e-mehnat, ġhubār-e-dāman-e-daulat

nam-e-peshānī-e-ġhairat, ḳham-e-zulf-e-rasā hotā

huā hotā kisī dastār-e-kaj par phuul kī tarah

aur us dastār-e-kaj kī tamkanat par hañs rahā hotā

kisī maġhrūr kī gardan pe hotā bojh ehsāñ kā

kisī zālim ke dil meñ dard ho kar lā-davā hotā

kisī mun.im ke chehre par ḳhushī hājat-ravā.ī kī

kisī nādār kī nazroñ meñ sharm-e-iltijā hotā

kisī bhaTke hue raahī ko detā dāvat-e-manzil

bayābāñ kī añdherī shab meñ jogī kā diyā hotā

kisī ke kalba-e-ahzāñ meñ sham-e-muzmahil ban kar

kisī bīmār muflis ke sirhāne ro rahā hotā

sharar ban kar kisī nādār ghar ke sard chūlhe meñ

''ba-sad ummīd-e-fardā'' zer-e-ḳhākistar dabā hotā

yatīm-e-be-navā kī rah-guzar par ashrafī ban kar

la.īm-e-fāqa-kash kī jeb-e-mumsik se girā hotā

niystāñ se nikal kar hasrat-ābād-e-tamaddun meñ

gadā-e-pīr o nā-bīnā ke hāthoñ kā asā hotā

shikasta jhoñpaḌe meñ bāñsurī-e-dahqāñ kī sur ban kar

sukūt-e-nīm-shab meñ rāz-e-hastī kah rahā hotā

ġharaz is hasrat-o-andoh-o-yās-o-ġham kī bastī meñ

kahīñ daur-āfrīñ hotā, kahīñ dard-āshnā hotā

''Duboyā mujh ko hone ne'' ba-qaul-e-ġhālib-e-dānā

''na thā kuchh to ḳhudā thaa, kuchh na hotā to ḳhudā hotā''

agar is gulshan-e-hasti mein hona hi muqaddar tha

to main ghunchon ki muTThi mein dil-e-bulbul hua hota

gunahon mein zarar hota, duaon mein asar hota

mohabbat ki nazar hota, hasinon ki ada hota

farogh-e-chehra-e-mehnat, ghubar-e-daman-e-daulat

nam-e-peshani-e-ghairat, KHam-e-zulf-e-rasa hota

hua hota kisi dastar-e-kaj par phul ki tarah

aur us dastar-e-kaj ki tamkanat par hans raha hota

kisi maghrur ki gardan pe hota bojh ehsan ka

kisi zalim ke dil mein dard ho kar la-dawa hota

kisi munim ke chehre par KHushi hajat-rawai ki

kisi nadar ki nazron mein sharm-e-iltija hota

kisi bhaTke hue rahi ko deta dawat-e-manzil

bayaban ki andheri shab mein jogi ka diya hota

kisi ke kalba-e-ahzan mein sham-e-muzmahil ban kar

kisi bimar muflis ke sirhane ro raha hota

sharar ban kar kisi nadar ghar ke sard chulhe mein

ba-sad ummid-e-farda zer-e-KHakistar daba hota

yatim-e-be-nawa ki rah-guzar par ashrafi ban kar

laim-e-faqa-kash ki jeb-e-mumsik se gira hota

niystan se nikal kar hasrat-abaad-e-tamaddun mein

gada-e-pir o na-bina ke hathon ka asa hota

shikasta jhonpaDe mein bansuri-e-dahqan ki sur ban kar

sukut-e-nim-shab mein raaz-e-hasti kah raha hota

gharaz is hasrat-o-andoh-o-yas-o-gham ki basti mein

kahin daur-afrin hota, kahin dard-ashna hota

Duboya mujh ko hone ne ba-qaul-e-ghaalib-e-dana

na tha kuchh to KHuda tha, kuchh na hota to KHuda hota