shaer

kuchh qaus-e-quzah se rañgat lī kuchh nuur churāyā tāroñ se

bijlī se taḌap ko maañg liyā kuchh kaif uḌāyā bahāroñ se

phūloñ se mahak shāḳhoñ se lachak aur mañDvoñ se ThanDā saaya

jañgal kī kuñvārī kaliyoñ ne de Daalā apnā sarmāya

bad-mast javānī se chhīnī kuchh be-fikrī kuchh allaḌhpan

phir husn-e-junūñ-parvar ne dī āshufta-sarī dil kī dhaḌkan

bikhrī huī rañgīñ kirnoñ ko āñkhoñ se chun kar laatā huuñ

fitrat ke pareshāñ naġhmoñ se ik apnā giit banātā huuñ

firdaus-e-ḳhayālī meñ baiThā ik but ko tarāshā kartā huuñ

phir apne dil kī dhaḌkan ko patthar ke dil meñ bhartā huuñ

kuchh qaus-e-quzah se rangat li kuchh nur churaya taron se

bijli se taDap ko mang liya kuchh kaif uDaya bahaaron se

phulon se mahak shaKHon se lachak aur manDwon se ThanDa saya

jangal ki kunwari kaliyon ne de Dala apna sarmaya

bad-mast jawani se chhini kuchh be-fikri kuchh allaDhpan

phir husn-e-junun-parwar ne di aashufta-sari dil ki dhaDkan

bikhri hui rangin kirnon ko aankhon se chun kar lata hun

fitrat ke pareshan naghmon se ek apna git banata hun

firdaus-e-KHayali mein baiTha ek but ko tarasha karta hun

phir apne dil ki dhaDkan ko patthar ke dil mein bharta hun