shaeron ka jabr

chaa.e kī bhaap meñ

ghulte, ma.adūm hote hue qahqahe shaam kā bāñkpan

koī misra.a dhueñ ke bagūloñ meñ compos hotā huā

koī nukta jo asrār ke ghup añdhere se sho.ala-sifat sar uThā.e

ajab dhīmā dhīmā nasha iḳhtilāfāt kā

apne nichle suroñ meñ koī fikr marbūt kartā huā zāviya

tanz ke nāvak-e-ḳhush-salīqa kī san-san

havāoñ se mahfūz sāñsoñ meñ ārāsta muḳhtalif sigreToñ kī mahak

shaam ke surma.ī bāñkpan meñ kisī coat, muflar, sweater se uThtī huī

ḳhushbu-e-āshnā

joḌtī hai hameñ ik samay se jo muddat se

ik nā-mulā.em zamāne meñ mahkūm hai

kaun lahze ko vāpas bulā.e

samay ko mukammal kare

apnī nazmeñ usī ik tasalsul-zada dā.ere meñ haiñ

purkār jin kī rihā.ī pe maa.il nahīñ

resturānoñ ke konoñ meñ sahmī huī

kitnī shāmoñ kā jaadū yahāñ satr-dar-satr mahbūs hai

ham jo qaid-e-zamāñ-o-makāñ se nikalne ko par mārte haiñ

bhalā shaam Dhalne pe alfāz ke panchhiyoñ ko jakaḌte haiñ kyuuñ

dām-e-tasvīr meñ

ye bagūle, dhuāñ, bhaap asīrī ke aadī nahīñ

shaam ḳhud raat kī god meñ jā ke girne ko be-tāb hai

chae ki bhap mein

ghulte, madum hote hue qahqahe sham ka bankpan

koi misra dhuen ke bagulon mein compos hota hua

koi nukta jo asrar ke ghup andhere se shoala-sifat sar uThae

ajab dhima dhima nasha iKHtilafat ka

apne nichle suron mein koi fikr marbut karta hua zawiya

tanz ke nawak-e-KHush-saliqa ki san-san

hawaon se mahfuz sanson mein aarasta muKHtalif sigreTon ki mahak

sham ke surmai bankpan mein kisi coat, muflar, sweater se uThti hui

KHushbu-e-ashna

joDti hai hamein ek samay se jo muddat se

ek na-mulaem zamane mein mahkum hai

kaun lahze ko wapas bulae

samay ko mukammal kare

apni nazmen usi ek tasalsul-zada daere mein hain

purkar jin ki rihai pe mail nahin

resturanon ke konon mein sahmi hui

kitni shamon ka jadu yahan satr-dar-satr mahbus hai

hum jo qaid-e-zaman-o-makan se nikalne ko par marte hain

bhala sham Dhalne pe alfaz ke panchhiyon ko jakaDte hain kyun

dam-e-taswir mein

ye bagule, dhuan, bhap asiri ke aadi nahin

sham KHud raat ki god mein ja ke girne ko be-tab hai