shahi badla

kase hue ektāre par haiñ geñde ke do phuul

mehñdī lage hāthoñ par hiire motī jaḌe do naqsh

bāñsurī ke hoñToñ se nikle āThvīñ sur kā giit

shaam amaltāsoñ kī sunā.e taaza taaza nazm

ā.īne meñ gorī ke umrāo-jān sā ruup

āñkhoñ meñ be-tāb tamannā dhaḌkan hai be-rabt

duur samay ke paar se aane vaalā hai shahzāda

gard uḌātī rath se utrā āḳhir ek javān

achkan par hai sajā huā surḳhāb kā niilā par

paan supārī chūnā katthā resham resham jism

Dhol kī thaap pe raqsāñ ghuñgrū aur gorī kā dil

mahal-sarā kī dīvāroñ par hai pyaas kā mīThā rañg

jism se niklā niklā jaa.e gorī kā har añg

shahzāde kī sāñsoñ meñ sandal ke araq kī baas

rath-bānoñ kī ragoñ meñ an jaane lamhoñ kā kaif

jism aur jaam kī ra.anā.ī meñ haar kā dard-e-fanā

shahzāde ke siine par haiñ raqqāsa ke ashk

īrānī qālīn par raqsāñ raqqāsa kā ḳhuun

darvāze ke bāhar laTkā jañg meñ haar kā daaġh

shahzāde ke hoñToñ par hai fāteh kī muskān

kase hue ektare par hain gende ke do phul

mehndi lage hathon par hire moti jaDe do naqsh

bansuri ke honTon se nikle aaThwin sur ka git

sham amaltason ki sunae taza taza nazm

aaine mein gori ke umrao-jaan sa rup

aankhon mein be-tab tamanna dhaDkan hai be-rabt

dur samay ke par se aane wala hai shahzada

gard uDati rath se utra aaKHir ek jawan

achkan par hai saja hua surKHab ka nila par

pan supari chuna kattha resham resham jism

Dhol ki thap pe raqsan ghungru aur gori ka dil

mahal-sara ki diwaron par hai pyas ka miTha rang

jism se nikla nikla jae gori ka har ang

shahzade ki sanson mein sandal ke araq ki bas

rath-banon ki ragon mein an jaane lamhon ka kaif

jism aur jam ki ranai mein haar ka dard-e-fana

shahzade ke sine par hain raqqasa ke ashk

irani qalin par raqsan raqqasa ka KHun

darwaze ke bahar laTka jang mein haar ka dagh

shahzade ke honTon par hai fateh ki muskan