shair-e-KHush-nawa

vahī kār-e-duniyā

vahī kār-e-duniyā ke apne jhamele

vahī dil kī hālat

vahī ḳhvāhishoñ ārzūoñ ke mele

vahī zindagī se bharī bhiiḌ meñ chalne vaale sabhī log

apnī jagah par akele

ka.ī gard-ālūd manzar nigāhoñ kī dahlīz par jam ga.e haiñ

mujhe yuuñ lagā jaise chalte hue vaqt ke qāfile tham ga.e haiñ

zarā sīḌhiyoñ se udhar maiñ ne dekhā

vahī shahr hai aur vahī shahr kī be-karāmat fazā hai

vahī ḳhalq hai aur vahī ḳhalq ke bhuul jaane kī apnī adā hai

vahī rāste haiñ vahī be-suhūlat safar kī sazā hai

vahī saañs lene ko jiine ko be-mehr āb-o-havā hai

vahī zindagī hai vahī us ke chāroñ taraf be-tahaffuz ridā hai

vahī sīḌhiyoñ se udhar rāhdārī ke baa.eñ taraf ḳhālī kamra

tirī guftugū se bharā ḳhālī kamra

tire qahqahoñ ke samundar meñ Duubā huā āñsuoñ kā jazīra

jazīre meñ uḌtā huā ik parinda

muñDeroñ darīchoñ daraḳhtoñ kī tanhā.iyoñ kā mudāvā parinda

tirī chāhatoñ aur vafā-dāriyoñ ke ufuq par sitāra-numā ik parinda

tire giit gaatā

tamannāoñ kī bārishoñ meñ nahātā

kisī taaza imkān ko jagmagātā

kahīñ duur phailī huī kahkashāoñ meñ gum ho gayā hai

zarā sīḌhiyoñ se udhar maiñ ne dekhā

ka.ī likhne vaale

ḳhushāmad kā kaasa liye apne ġhībat-kade meñ khaḌe haiñ

siyāsī vaDere

musāvāt kā naam le kar hamesha ġharīb aadmī kī anā se laḌe haiñ

ka.ī ahl-e-dānish

jo mazlūm kī āh-o-zārī pe dikhte the

zālim ke dar par paḌe haiñ

yahāñ koī chhoTā nahīñ hai

sab ik dūsre se baḌe haiñ

tirī shā.irī kā ḳhamīr apne jazboñ kī sachchā.iyoñ se uThā thā

tū apne usūloñ ke ātish-fishāñ par khaḌā

zindagī kī riyā-kāriyoñ se nabard-āzmā thā

tū apne ravayyoñ kī sab hālatoñ meñ

mohabbat se likkhī huī ik duā thā

tū ahl-e-vafā kā zamīr āshnā thā

abhī sīḌhiyāñ chaḌhte chaḌhte maiñ ruk sā gayā huuñ

vahāñ kaun hai

kaun hai ab jo dastak kī pahlī kiran kī hikāyat sunegā

na.e ratjagoñ kī masāfat meñ uljhe hue aane vaale dinoñ kī

rivāyat sunegā

charāġhoñ kī āvāz meñ

ā.inoñ kī tilāvat sunegā

mire shā.ir-e-ḳhush-navā

tū ki dushman bhī achchhā thā

aur dostī meñ bhī terā yahāñ koī saanī nahīñ hai

jise ahl-e-dil bhuul jā.eñge

tū vo kahānī nahīñ hai

wahi kar-e-duniya

wahi kar-e-duniya ke apne jhamele

wahi dil ki haalat

wahi KHwahishon aarzuon ke mele

wahi zindagi se bhari bhiD mein chalne wale sabhi log

apni jagah par akele

kai gard-alud manzar nigahon ki dahliz par jam gae hain

mujhe yun laga jaise chalte hue waqt ke qafile tham gae hain

zara siDhiyon se udhar main ne dekha

wahi shahr hai aur wahi shahr ki be-karamat faza hai

wahi KHalq hai aur wahi KHalq ke bhul jaane ki apni ada hai

wahi raste hain wahi be-suhulat safar ki saza hai

wahi sans lene ko jine ko be-mehr aab-o-hawa hai

wahi zindagi hai wahi us ke chaaron taraf be-tahaffuz rida hai

wahi siDhiyon se udhar rahdari ke baen taraf KHali kamra

teri guftugu se bhara KHali kamra

tere qahqahon ke samundar mein Duba hua aansuon ka jazira

jazire mein uDta hua ek parinda

munDeron darichon daraKHton ki tanhaiyon ka mudawa parinda

teri chahaton aur wafa-dariyon ke ufuq par sitara-numa ek parinda

tere git gata

tamannaon ki barishon mein nahata

kisi taza imkan ko jagmagata

kahin dur phaili hui kahkashaon mein gum ho gaya hai

zara siDhiyon se udhar main ne dekha

kai likhne wale

KHushamad ka kasa liye apne ghibat-kade mein khaDe hain

siyasi waDere

musawat ka nam le kar hamesha gharib aadmi ki ana se laDe hain

kai ahl-e-danish

jo mazlum ki aah-o-zari pe dikhte the

zalim ke dar par paDe hain

yahan koi chhoTa nahin hai

sab ek dusre se baDe hain

teri shairi ka KHamir apne jazbon ki sachchaiyon se uTha tha

tu apne usulon ke aatish-fishan par khaDa

zindagi ki riya-kariyon se nabard-azma tha

tu apne rawayyon ki sab haalaton mein

mohabbat se likkhi hui ek dua tha

tu ahl-e-wafa ka zamir aashna tha

abhi siDhiyan chaDhte chaDhte main ruk sa gaya hun

wahan kaun hai

kaun hai ab jo dastak ki pahli kiran ki hikayat sunega

nae ratjagon ki masafat mein uljhe hue aane wale dinon ki

riwayat sunega

charaghon ki aawaz mein

aainon ki tilawat sunega

mere shair-e-KHush-nawa

tu ki dushman bhi achchha tha

aur dosti mein bhi tera yahan koi sani nahin hai

jise ahl-e-dil bhul jaenge

tu wo kahani nahin hai