shair ki duniya

hotā huuñ jab maiñ tanhā ye sochtā huuñ aksar

ābādiyāñ haiñ achchhī yā jañgaloñ ke manzar

shā.ir huuñ maiñ mirā ho maskan alag jahāñ se

shahroñ ke shor-o-ġhul se tārīk āsmāñ se

saa.e meñ peḌ ke maiñ bistar lagā.ūñ apnā

ThanDī havā ho aatī bahtā ho saaf dariyā

rañgīniyāñ shafaq kī dil ko mire lubhā.eñ

shams-o-qamar jahāñ ke qisse na.e sunā.eñ

qudrat kā ham-zabāñ huuñ aur us ke bhed pā.ūñ

gahrā.iyoñ meñ us kī goyā utar maiñ jā.ūñ

2

par aql kā hai kahnā ye sab ġhalat hai nādāñ

gūñgī hai terī qudrat manzar haiñ us ke be-jāñ

be-kār hai agar to dasht-o-jabal basā.e

be-sarfa hai agar to hamdam unheñ banā.e

shā.ir tujhe haiñ kahte hai ishq terā jiinā

fitrat hai paak terī hai qalb-e-tūr-e-sīnā

tū nūr-e-sarmadī kī hai jhalkiyāñ dikhātā

insāñ ko āsmāñ kī saireñ hai to karātā

terā qalam jahāñ meñ halchal sī Dāltā hai

Duube ubhārtā hai girte sambhāltā hai

3

par kyuuñ tujhe ai shā.ir bastī se hai kudūrat

ābādiyoñ meñ pal kar ābādiyoñ se nafrat

insāñ aur us kī fitrat parkhī nahīñ hai tū ne

aalam aur us kī vus.at paa.ī nahīñ hai tū ne

mātam kahīñ bapā hai ḳhushiyāñ kahīñ haiñ hotī

iqbāl hai kahīñ to qismat kahīñ hai sotī

jo ik taraf qazā ke tūfān aa rahe haiñ

tū ik taraf sahāb-e-rahmat bhī chhā rahe haiñ

terā hai rutba aalī is bazm-e-zindagī meñ

aa aa sharīk ho jā is razm-e-zindagī meñ

ālām ko ghaTā de āsā.isheñ baḌhā de

sham-e-suḳhan jalā kar sab zulmateñ haTā de

aa kab se muntazir hai aadam kā ye gharānā

ābād is meñ ho jā terī yahī hai duniyā

hota hun jab main tanha ye sochta hun aksar

aabaadiyan hain achchhi ya jangalon ke manzar

shair hun main mera ho maskan alag jahan se

shahron ke shor-o-ghul se tarik aasman se

sae mein peD ke main bistar lagaun apna

ThanDi hawa ho aati bahta ho saf dariya

ranginiyan shafaq ki dil ko mere lubhaen

shams-o-qamar jahan ke qisse nae sunaen

qudrat ka ham-zaban hun aur us ke bhed paun

gahraiyon mein us ki goya utar main jaun

2

par aql ka hai kahna ye sab ghalat hai nadan

gungi hai teri qudrat manzar hain us ke be-jaan

be-kar hai agar to dasht-o-jabal basae

be-sarfa hai agar to hamdam unhen banae

shair tujhe hain kahte hai ishq tera jina

fitrat hai pak teri hai qalb-e-tur-e-sina

tu nur-e-sarmadi ki hai jhalkiyan dikhata

insan ko aasman ki sairen hai to karaata

tera qalam jahan mein halchal si Dalta hai

Dube ubhaarta hai girte sambhaalta hai

3

par kyun tujhe ai shair basti se hai kudurat

aabaadiyon mein pal kar aabaadiyon se nafrat

insan aur us ki fitrat parkhi nahin hai tu ne

aalam aur us ki wusat pai nahin hai tu ne

matam kahin bapa hai KHushiyan kahin hain hoti

iqbaal hai kahin to qismat kahin hai soti

jo ek taraf qaza ke tufan aa rahe hain

tu ek taraf sahab-e-rahmat bhi chha rahe hain

tera hai rutba aali is bazm-e-zindagi mein

aa aa sharik ho ja is razm-e-zindagi mein

aalam ko ghaTa de aasaishen baDha de

sham-e-suKHan jala kar sab zulmaten haTa de

aa kab se muntazir hai aadam ka ye gharana

aabaad is mein ho ja teri yahi hai duniya