shair ki tamannaen

umañgeñ dil se uTh uTh kar taḳhayyul meñ sañvartī haiñ

mire zulmat-kada meñ arsh se hūreñ utartī haiñ

vo merī hasrateñ vo ārzūeñ vo tamannā.eñ

jo bar aa.iiñ to duniyā ke jahannum sard ho jaa.eñ

yaqīñ hotā hai dil ko jāda-e-haq se guzarnā hai

mujhe mustaqbil-e-insāniyat ta.amīr karnā hai

uThūñ uTh kar nizām-e-mahfil-e-hastī badal Dālūñ

baḌhūñ baḌh kar badī kī quvvatoñ kā sar kuchal Dālūñ

sarāpā soz ho kar garm kar duuñ qalb-e-hastī ko

tapish-andoziyoñ kā daras duuñ sukkān-e-pastī ko

zamīr-o-fikr-e-insānī kī āzādī kā ḳhvāhāñ huuñ

maiñ nasl-o-rañg-o-ḳhūñ ke imtiyāzoñ se gurezāñ huuñ

ye bazm-e-rañg-o-bū mahrūm-e-rañg-o-bū na ho jaa.e

mujhe Dar hai ki ye duniyā maqām-e-hū na ho jaa.e

sameTūñ markaz-e-insāniyat par zulm barham ko

sikhā.ūñ ehtirām-e-zindagī aulād-e-ādam ko

vaqār-e-ādamiyat se ḳhirad ko āshnā kar duuñ

ġhuzār-e-ishq se ā.īna-e-dil kī jilā kar duuñ

haqīqat āshnā-e-zauq kar duuñ kaj-nigāhoñ ko

jagah deñ nekiyoñ meñ ye mire rañgīñ gunāhoñ ko

miTā kar imtiyāz-e-nek-o-bad sab ek ho jaa.eñ

ḳhudā bhī ek hai bande bhī us ke ek ho jaa.eñ

na gulchīñ ho na sayyād-e-sitam-rāñ kī sitam-rānī

na gul kī chāk-dāmānī na ġhunchoñ kī pareshānī

na tūfāñ ho na tūfāñ meñ ġharīboñ kā jahāz aa.e

ḳhudāyā ham fareb-e-kashtī-o-sāhil se baaz aa.e

ye merī hasrateñ ye ārzūeñ ye tamannā.eñ

jo bar aa.eñ to duniyā ke jahannum sard ho jaa.eñ

mirī ḳhāmosh rātoñ meñ bhī ik halchal sī rahtī hai

duā kartā huuñ maiñ insāniyat āmīn kahtī hai

umangen dil se uTh uTh kar taKHayyul mein sanwarti hain

mere zulmat-kada mein arsh se huren utarti hain

wo meri hasraten wo aarzuen wo tamannaen

jo bar aain to duniya ke jahannum sard ho jaen

yaqin hota hai dil ko jada-e-haq se guzarna hai

mujhe mustaqbil-e-insaniyat tamir karna hai

uThun uTh kar nizam-e-mahfil-e-hasti badal Dalun

baDhun baDh kar badi ki quwwaton ka sar kuchal Dalun

sarapa soz ho kar garm kar dun qalb-e-hasti ko

tapish-andoziyon ka daras dun sukkan-e-pasti ko

zamir-o-fikr-e-insani ki aazadi ka KHwahan hun

main nasl-o-rang-o-KHun ke imtiyazon se gurezan hun

ye bazm-e-rang-o-bu mahrum-e-rang-o-bu na ho jae

mujhe Dar hai ki ye duniya maqam-e-hu na ho jae

sameTun markaz-e-insaniyat par zulm barham ko

sikhaun ehtiram-e-zindagi aulad-e-adam ko

waqar-e-adamiyat se KHirad ko aashna kar dun

ghuzar-e-ishq se aaina-e-dil ki jila kar dun

haqiqat aashna-e-zauq kar dun kaj-nigahon ko

jagah den nekiyon mein ye mere rangin gunahon ko

miTa kar imtiyaz-e-nek-o-bad sab ek ho jaen

KHuda bhi ek hai bande bhi us ke ek ho jaen

na gulchin ho na sayyaad-e-sitam-ran ki sitam-rani

na gul ki chaak-damani na ghunchon ki pareshani

na tufan ho na tufan mein gharibon ka jahaz aae

KHudaya hum fareb-e-kashti-o-sahil se baz aae

ye meri hasraten ye aarzuen ye tamannaen

jo bar aaen to duniya ke jahannum sard ho jaen

meri KHamosh raaton mein bhi ek halchal si rahti hai

dua karta hun main insaniyat aamin kahti hai