shairon

va.ada karo shā.iroñ

aglī jañg-e-azīm shurūa hone se pahle

tum hamāre ghoḌoñ ke pīchhe pīchhe bhāgnā

aur hamārī talvāroñ ko uThānā siikh jāoge

dhaat se banī chīzoñ ko

chamkāne vaalī polish ke martabān

ham tumhāre ghar pahuñchā deñge

aur tum zindagī bhar

hamārī Topiyoñ aur tamġhoñ ko

āsmānī chamak dete rahoge

apne dil par haath rakh kar

sachche dil se halaf uThāo shā.er

ki hamāre jañgī tayyāroñ aur mīzā.iloñ ke sivā

kisī kī tārīf nahīñ karoge

hamārī bandūqoñ aur Tankoñ kī nāloñ meñ

kisī ko phuul nahīñ rakhne doge

hamārī topoñ aur jūtoñ kī dhamak ke sivā

koī aur āvāz nahīñ sunoge

aglī jañg-e-azīm kā elaan

hamāre saath likho shā.iroñ

jañgī tarānoñ ke bol

hamāre saath doharāo shā.iroñ

jab jañg shurūa hogī

hamārī talvāreñ hameñ de denā

jab dushman hamla karegā

ham apne ghoḌoñ par savār

pīchhe kī taraf dauḌeñge

shā.iroñ

marne ke liye tayyār rahnā

wada karo shairon

agli jang-e-azim shurua hone se pahle

tum hamare ghoDon ke pichhe pichhe bhagna

aur hamari talwaron ko uThana sikh jaoge

dhat se bani chizon ko

chamkane wali polish ke martaban

hum tumhaare ghar pahuncha denge

aur tum zindagi bhar

hamari Topiyon aur tamghon ko

aasmani chamak dete rahoge

apne dil par hath rakh kar

sachche dil se halaf uThao shaer

ki hamare jangi tayyaron aur mizailon ke siwa

kisi ki tarif nahin karoge

hamari banduqon aur Tankon ki nalon mein

kisi ko phul nahin rakhne doge

hamari topon aur juton ki dhamak ke siwa

koi aur aawaz nahin sunoge

agli jang-e-azim ka elan

hamare sath likho shairon

jangi taranon ke bol

hamare sath doharao shairon

jab jang shurua hogi

hamari talwaren hamein de dena

jab dushman hamla karega

hum apne ghoDon par sawar

pichhe ki taraf dauDenge

shairon

marne ke liye tayyar rahna