sham hai dhuan dhuan

kyoñ shaam kā āñchal mailā hai

har samt dhuāñ sā phailā hai

mādūm hue āsār sabhī

kaliyoñ kī chanchal āñkheñ

jhukī jhukī sī mūñde palkeñ

gul-badan sar nigūñ ho ga.e

ḳhushbū bhī uḌī

aur gesū-e-shab meñ jā uljhī

mahtāb bhī ubhrā chupke se

dhuñdlā dhuñdlā

phīkā phīkā

maġhmūm shuā.eñ phīkī sī

har samt thā us kā aks-e-hazīñ

ujḌā ujḌā

vīrāñ vīrāñ

lamhoñ kī zabāneñ guñg huiiñ

uqde kī kaḌiyāñ khultī ga.iiñ

jab tez thī āñdhī duur kahīñ

uḌtī thī qabā-e-jism vahīñ

bechain huī phir ruuh bahut

kuchh be-āvāz sī chīḳheñ thiiñ

tahlīl havā meñ hotī thiiñ

kuchh abr ke TukḌe āvāra

jaise ḳhushiyoñ kā pushtāra

thak kar bikhrā de koī unheñ

purvā.ī kā jhoñkā halkā sā

phir duur uḌā le jaa.e unheñ

ab shaam kī is tanhā.ī meñ

yuuñ baiThe haiñ chup-chāp sabhī

kab hogī sahar mālūm nahīñ

lekin manzar in sub.hoñ kā

nazroñ meñ sajā kar baiThe haiñ

har saañs girāñ

har aas gumāñ

har raaz nihāñ

chup-chāp zabāñ

namnāk sī āñkhoñ par bojhal

palkoñ ko jhukā.e baiThe haiñ

kyon sham ka aanchal maila hai

har samt dhuan sa phaila hai

madum hue aasar sabhi

kaliyon ki chanchal aankhen

jhuki jhuki si munde palken

gul-badan sar nigun ho gae

KHushbu bhi uDi

aur gesu-e-shab mein ja uljhi

mahtab bhi ubhra chupke se

dhundla dhundla

phika phika

maghmum shuaen phiki si

har samt tha us ka aks-e-hazin

ujDa ujDa

viran viran

lamhon ki zabanen gung huin

uqde ki kaDiyan khulti gain

jab tez thi aandhi dur kahin

uDti thi qaba-e-jism wahin

bechain hui phir ruh bahut

kuchh be-awaz si chiKHen thin

tahlil hawa mein hoti thin

kuchh abr ke TukDe aawara

jaise KHushiyon ka pushtara

thak kar bikhra de koi unhen

purwai ka jhonka halka sa

phir dur uDa le jae unhen

ab sham ki is tanhai mein

yun baiThe hain chup-chap sabhi

kab hogi sahar malum nahin

lekin manzar in subhon ka

nazron mein saja kar baiThe hain

har sans giran

har aas guman

har raaz nihan

chup-chap zaban

namnak si aankhon par bojhal

palkon ko jhukae baiThe hain