sham ke din raat

shaam meñ ġhaar thā

ġhaar meñ raat thī

raat ke nam añdhere meñ ik ajnabiyat kā ehsās thā

chaltī sāñsoñ kī hiltī huī satah par

vaqt kī naav Thahrī huī thī

sansanāte hue nam añdhere meñ poreñ dhaḌakne lagīñ

ġhaar meñ mahv-e-parvāz palkoñ ke panchhī ulajhne lage

ġhaar meñ shaam thī

chand lamhoñ meñ sadiyāñ basar kar ke jab

ġhaar ke daur se ham zamāne meñ aa.e

to Dhalte hue din kī giilī chamak pattharoñ par jamī thī

muḌ ke dekhā to palkoñ ko parvā lagī

aur maḳhmūr āñkhoñ ko sapnā lagā

gūñjte ġhaar kā nam añdherā hameñ apnā apnā lagā

ġhaar ne kuchh to jaane diyā kuchh hameñ rakh liyā thā

nihāyat subuksār the

aise chalte the jaise zamīñ ke makīñ

kurra-e-māh par chal rahe hoñ

shaam ke peḌ par ik parinda

gajartān bheroñ meñ gaane lagā

vaqt kā sāñvlā peḌ hai

peḌ ke malgaje paat haiñ

dil ke apne zamān o makāñ

shaam ke apne din raat haiñ

sham mein ghaar tha

ghaar mein raat thi

raat ke nam andhere mein ek ajnabiyat ka ehsas tha

chalti sanson ki hilti hui satah par

waqt ki naw Thahri hui thi

sansanate hue nam andhere mein poren dhaDakne lagin

ghaar mein mahw-e-parwaz palkon ke panchhi ulajhne lage

ghaar mein sham thi

chand lamhon mein sadiyan basar kar ke jab

ghaar ke daur se hum zamane mein aae

to Dhalte hue din ki gili chamak pattharon par jami thi

muD ke dekha to palkon ko parwa lagi

aur maKHmur aankhon ko sapna laga

gunjte ghaar ka nam andhera hamein apna apna laga

ghaar ne kuchh to jaane diya kuchh hamein rakh liya tha

nihayat subuksar the

aise chalte the jaise zamin ke makin

kurra-e-mah par chal rahe hon

sham ke peD par ek parinda

gajartan bheron mein gane laga

waqt ka sanwla peD hai

peD ke malgaje pat hain

dil ke apne zaman o makan

sham ke apne din raat hain