sham

shaam hai

lambī galiyoñ meñ ūñche makānoñ kī dīvār par

phailte saa.e haiñ

duur ufuq par siyah-rañg bādal ke pīchhe

sulagtī huī dhuup hai

aise hī tere jīvan kā Dhaltā huā ruup hai

is havā meñ tire dard kā giit hai

un daraḳhtoñ ke girte hue āñsuoñ meñ

kisī aur kā ġham nahīñ

ek tere sivā koī mātam nahīñ

ek lamhe meñ ye jagmagāte hue shoḳh rang

ik dhuāñ ban ke uḌ jaane vaale haiñ

in kī damaktī kalī bujhne vaalī hai

vo tīrgī chhāne vaalī hai

jab terā ehsās tujh se bichhaḌ ke

ghane aur be-nām jangal meñ kho jā.egā

tū yahāñ aarzū kī chitā pe khaḌī ro.egī

sham hai

lambi galiyon mein unche makanon ki diwar par

phailte sae hain

dur ufuq par siyah-rang baadal ke pichhe

sulagti hui dhup hai

aise hi tere jiwan ka Dhalta hua rup hai

is hawa mein tere dard ka git hai

un daraKHton ke girte hue aansuon mein

kisi aur ka gham nahin

ek tere siwa koi matam nahin

ek lamhe mein ye jagmagate hue shoKH rang

ek dhuan ban ke uD jaane wale hain

in ki damakti kali bujhne wali hai

wo tirgi chhane wali hai

jab tera ehsas tujh se bichhaD ke

ghane aur be-nam jangal mein kho jaega

tu yahan aarzu ki chita pe khaDi roegi