shanti

tumhāre āñgan meñ raushnī ho

hamāre ghar meñ bhī zindagī ho

tumhāre bachche bhī muskurā.eñ

hamāre bachche bhī ro na paa.eñ

tumheñ bhī lab kholne kā haq ho

hameñ bhī kuchh bolne kā haq ho

tumhārī jantā bhī pur-sukūñ ho

hameñ bhī ik amn kā junūñ ho

tumheñ bhī chāhat kī justujū ho

hameñ bhī insāniyat kī ḳhū ho

chalo ik aisī fazā kī ḳhātir

ham ek ho kar alam uThā.eñ

chalo ki nafrat kī sab fasīleñ

khaḌī haiñ kab se unheñ girā.eñ

tarāne amn aur āshtī ke

ham apne apne suroñ meñ gaa.eñ

chalo ki zulmat kī āñdhiyoñ meñ

mohabbatoñ ke diye jalā.eñ

nizām-e-zar kī burā.iyoñ ko

jabr kī sab ḳhudā.iyoñ ko

tum apnī dhartī pe rauñd Daalo

ham apne māhaul se haTā.eñ

phir ek aisā nizām hogā

sitam kā qissa tamām hogā

na koī jag meñ rahegā hākim

na koī jag meñ ġhulām hogā

chalo ki mil kar alam uThā.eñ

mohabbatoñ ke diye jalā.eñ

tumhaare aangan mein raushni ho

hamare ghar mein bhi zindagi ho

tumhaare bachche bhi muskuraen

hamare bachche bhi ro na paen

tumhein bhi lab kholne ka haq ho

hamein bhi kuchh bolne ka haq ho

tumhaari janta bhi pur-sukun ho

hamein bhi ek amn ka junun ho

tumhein bhi chahat ki justuju ho

hamein bhi insaniyat ki KHu ho

chalo ek aisi faza ki KHatir

hum ek ho kar alam uThaen

chalo ki nafrat ki sab fasilen

khaDi hain kab se unhen giraen

tarane amn aur aashti ke

hum apne apne suron mein gaen

chalo ki zulmat ki aandhiyon mein

mohabbaton ke diye jalaen

nizam-e-zar ki buraiyon ko

jabr ki sab KHudaiyon ko

tum apni dharti pe raund Dalo

hum apne mahaul se haTaen

phir ek aisa nizam hoga

sitam ka qissa tamam hoga

na koi jag mein rahega hakim

na koi jag mein ghulam hoga

chalo ki mil kar alam uThaen

mohabbaton ke diye jalaen