shab charagh

basoñ kā shor dhuāñ gard dhuup kī shiddat

buland o baalā imārāt sar-nigūñ insāñ

talāsh-e-rizq meñ niklā huā ye jamm-e-ġhafīr

lapaktī bhāgtī maḳhlūq kā ye sail-e-ravāñ

har ik ke siine meñ yādoñ kī munhadim qabreñ

har ek apnī hī āvāz-e-pā se rū-gardāñ

ye vo hujūm hai jis meñ koī falak pe nahīñ

aur is hujūm-e-sar-e-rāh se guzarte hue

na jaane kaise tumhārī vafā karam kā ḳhayāl

mire jabīñ ko kisī dast-e-āshnā kī tarah

jo chhū gayā hai to ashkoñ ke sote phuuT paḌe

sumūm o reg ke sahrā meñ ik nafas ke liye

chalī hai bād-e-tamannā to umr bhar kī thakan

sar-e-mizha simaT aa.ī hai ek aañsū meñ

ye vo guhar hai jo TuuTe to ḳhāk-e-pā meñ mile

ye vo guhar hai jo chamke to shab-charāġh bane

bason ka shor dhuan gard dhup ki shiddat

buland o baala imaraat sar-nigun insan

talash-e-rizq mein nikla hua ye jamm-e-ghafir

lapakti bhagti maKHluq ka ye sail-e-rawan

har ek ke sine mein yaadon ki munhadim qabren

har ek apni hi aawaz-e-pa se ru-gardan

ye wo hujum hai jis mein koi falak pe nahin

aur is hujum-e-sar-e-rah se guzarte hue

na jaane kaise tumhaari wafa karam ka KHayal

mere jabin ko kisi dast-e-ashna ki tarah

jo chhu gaya hai to ashkon ke sote phuT paDe

sumum o reg ke sahra mein ek nafas ke liye

chali hai baad-e-tamanna to umr bhar ki thakan

sar-e-mizha simaT aai hai ek aansu mein

ye wo guhar hai jo TuTe to KHak-e-pa mein mile

ye wo guhar hai jo chamke to shab-charagh bane