shab-e-wada shab-e-wada

shab-e-vā'da na tum aa.e

na mai chhalkī nigāhoñ kī

na amrit ke hasīñ pyāle se

hoñToñ ne 'atā-e-zindagī paa.ī

na zulf 'ambarīñ bikhrī sar-e-bālīñ

shab-e-vā'da jo yuuñ aa.ī

matā'-e-rā.egāñ laa.ī

shab-e-vā'da

na ḳhalvat ḳhāna-e-shab meñ

badan kī dhīmī dhīmī aañch se

ātish-kade dahke

na sargoshī ke dhīme dhīme sur meñ

tum ne bāteñ kiiñ

na madhoshī meñ panjam sur lagā kar

jism-o-jāñ harf-o-zabāñ bahke

har ik pal ḳhālī ḳhālī

dil kī har dhaḌkan savālī thī

shab-e-vā'da

shab-e-vā'da

na Dhaltī raat kī

pāgal havāoñ ne

pahan kar nuqra.ī paa.el

sar-e-dīvār-o-dar

shoḳhī se dastak dī

na vahshī rāgnī chheḌī

shab-e-vā'da

na sāzindoñ ne fitrat ke

basantī-rut ke sahrāoñ meñ pinhāñ

saaz chheḌe aur samāñ bāñdhā

zamīñ ḳhāmosh thī

to gumbad-e-gardūñ fasurda thā

har ik ehsās murda thā

shab-e-vā'da

na phulvārī ke rū-e-shabnamīñ se

rang-o-nik.hat ke bhañvar uTThe

na juuhī kī mahaktī dilrubā sāñseñ

tumhāre har bun-e-mū se nikaltī

narm ḳhushbūoñ ke jhoñkoñ se lipaT kar

mere paas aa.iiñ

shab-e-vā'da

huā to bas huā itnā

sanobar ke siyah pattoñ ke dāman se

laraztā be-hayā bīmār sā

mahtāb niklā thā

shab-e-vā'da

shab-e-vā'da

shab-e-wa'da na tum aae

na mai chhalki nigahon ki

na amrit ke hasin pyale se

honTon ne 'ata-e-zindagi pai

na zulf 'ambarin bikhri sar-e-baalin

shab-e-wa'da jo yun aai

mata'-e-raegan lai

shab-e-wa'da

na KHalwat KHana-e-shab mein

badan ki dhimi dhimi aanch se

aatish-kade dahke

na sargoshi ke dhime dhime sur mein

tum ne baaten kin

na madhoshi mein panjam sur laga kar

jism-o-jaan harf-o-zaban bahke

har ek pal KHali KHali

dil ki har dhaDkan sawali thi

shab-e-wa'da

shab-e-wa'da

na Dhalti raat ki

pagal hawaon ne

pahan kar nuqrai pael

sar-e-diwar-o-dar

shoKHi se dastak di

na wahshi ragni chheDi

shab-e-wa'da

na sazindon ne fitrat ke

basanti-rut ke sahraon mein pinhan

saz chheDe aur saman bandha

zamin KHamosh thi

to gumbad-e-gardun fasurda tha

har ek ehsas murda tha

shab-e-wa'da

na phulwari ke ru-e-shabnamin se

rang-o-nikhat ke bhanwar uTThe

na juhi ki mahakti dilruba sansen

tumhaare har bun-e-mu se nikalti

narm KHushbuon ke jhonkon se lipaT kar

mere pas aain

shab-e-wa'da

hua to bas hua itna

sanobar ke siyah patton ke daman se

larazta be-haya bimar sa

mahtab nikla tha

shab-e-wa'da

shab-e-wa'da