shafaq

shafaq phūlne kī bhī dekho bahār

havā meñ khilā hai ajab lāla-zār

huī shaam bādal badalte haiñ rañg

jinheñ dekh kar aql hotī hai dañg

nayā rañg hai aur nayā ruup hai

har ik ruup meñ ye vahī dhuup hai

tabī.at hai bādal kī rañgat pe loT

sunahrī lagā.ī hai qudrat ne goT

zarā dair meñ rañg badle ka.ī

banafshī o nāranjī o champa.ī

ye kyā bhed hai kyā karāmāt hai

har ik rañg meñ ik na.ī baat hai

ye maġhrib meñ jo bādaloñ kī hai baaḌ

bane sone chāñdnī ke goyā pahāḌ

falak nīl-gūñ is meñ surḳhī kī laag

hare ban meñ goyā lagā dī hai aag

ab āsār zāhir hue raat ke

ki parde chhaTe laal bānāt ke

shafaq phulne ki bhi dekho bahaar

hawa mein khila hai ajab lala-zar

hui sham baadal badalte hain rang

jinhen dekh kar aql hoti hai dang

naya rang hai aur naya rup hai

har ek rup mein ye wahi dhup hai

tabiat hai baadal ki rangat pe loT

sunahri lagai hai qudrat ne goT

zara dair mein rang badle kai

banafshi o naranji o champai

ye kya bhed hai kya karamat hai

har ek rang mein ek nai baat hai

ye maghrib mein jo baadalon ki hai baD

bane sone chandni ke goya pahaD

falak nil-gun is mein surKHi ki lag

hare ban mein goya laga di hai aag

ab aasar zahir hue raat ke

ki parde chhaTe lal banat ke