shahar-bano ke liye ek nazm

tumheñ jab dekhtā huuñ

to mirī āñkhoñ pe rañgoñ kī phuvāreñ paḌne lagtī haiñ

tumheñ suntā huuñ

to mujh ko qadīmī mandiroñ se ghanTiyoñ aur masjidoñ se vird kī āvāz aatī hai

tumhārā naam letā huuñ

to sadiyoñ qabl ke lākhoñ sahīfoñ ke muqaddas lafz merā saath dete haiñ

tumheñ chhū luuñ

to duniyā-bhar ke resham kā mulā.em-pan mirī poroñ ko aa kar gudgudātā hai

tumheñ gar chuum luuñ

to mere hoñToñ par ulūhī āsmānī nā-chashīda zā.iqe yuuñ phail jaate haiñ

ki us ke ba.ad mujh ko shahd bhī phīkā sā lagtā hai

tumheñ jab yaad kartā huuñ

to har har yaad ke sadqe meñ ashkoñ ke parinde chuum kar āzād kartā huuñ

tumheñ hañstī huī sun luuñ

to sātoñ sur samā.at meñ samā kar raqs karte haiñ

kabhī tum rūThtī ho

to mirī sāñseñ aTakne aur dhaḌkan thamne lagtī hai

tumhāre aur apne ishq kī har kaifiyat se āshnā huuñ maiñ

magar jānāñ

tumheñ bilkul bhulā dene kī jaane kaifiyat kyā hai

mujhe mahsūs hotā hai

ki marg-e-zāt ke ehsās se bhar jā.ūñgā fauran

tumheñ maiñ bhūlnā chāhūñgā to mar jā.ūñgā fauran

tumhein jab dekhta hun

to meri aankhon pe rangon ki phuwaren paDne lagti hain

tumhein sunta hun

to mujh ko qadimi mandiron se ghanTiyon aur masjidon se wird ki aawaz aati hai

tumhaara nam leta hun

to sadiyon qabl ke lakhon sahifon ke muqaddas lafz mera sath dete hain

tumhein chhu lun

to duniya-bhar ke resham ka mulaem-pan meri poron ko aa kar gudgudata hai

tumhein gar chum lun

to mere honTon par uluhi aasmani na-chashida zaiqe yun phail jate hain

ki us ke baad mujh ko shahd bhi phika sa lagta hai

tumhein jab yaad karta hun

to har har yaad ke sadqe mein ashkon ke parinde chum kar aazad karta hun

tumhein hansti hui sun lun

to saton sur samaat mein sama kar raqs karte hain

kabhi tum ruThti ho

to meri sansen aTakne aur dhaDkan thamne lagti hai

tumhaare aur apne ishq ki har kaifiyat se aashna hun main

magar jaanan

tumhein bilkul bhula dene ki jaane kaifiyat kya hai

mujhe mahsus hota hai

ki marg-e-zat ke ehsas se bhar jaunga fauran

tumhein main bhulna chahunga to mar jaunga fauran