shahidan-e-azadi

vo parastārān-e-āzādī shahīdān-e-vatan

zīnat-e-hindostāñ honā thā jin kā bāñkpan

is vatan ke vāste kyā kyā sahe ranj-o-mehan

naaz ke qābil hai un kī jāñ-nisārī kā chalan

ḳhuun se sīñchā vatan kī sar-zamīn-e-pāk ko

martaba iksīr kā baḳhshā yahāñ kī ḳhaak ko

ziist kī har ek ne.amat mulk par qurbān thī

rahnumā ke ik ishāre par tasadduq jaan thī

ḳhuun dāman par na thā un kī yahī pahchān thī

ġhāziyān-e-hind kī sab se nirālī shaan thī

ye sitam-gāroñ ko ulfat kā sabaq de kar ga.e

jin ko marnā chāhiye thā un ke badle mar ga.e

jab huī mahsūs āzādī kī un ko ehtiyāj

aur un farmāñ-ravāoñ se kiyā jab ehtijāj

taish se tharrā gayā bartāniya kā sāmrāj

zulm se us ke huā bedār phir saarā samāj

mulk meñ kholā unhoñ ne jang-e-āzādī kā baab

sāmrājī zulm jis se ho gayā phir be-naqāb

goliyāñ kitnī chalā.īñ jaliyāñ vaale baaġh par

zulm phir Dhaa.e avadh kī begamoñ ko maar kar

tiin din kis tarah faaqe se rahe shāh-e-zafar

tīsre din tasht par laa.e ga.e beToñ ke sar

zulm kī tārīḳh-e-ḳhūnīñ se haiñ go nāshād ham

aaj ke din faḳhr se karte haiñ un ko yaad ham

aur is ke baa'd bhī qurbāniyāñ dete rahe

phir bhagat singh aur sāthī us ke suulī par chaḌhe

sar pe lāla-lājpat raa.e ke bhī DanDe paḌe

bose baabū mulk se bāhar hī jā kar mar ga.e

aur lākhoñ mar ga.e jin ke nahīñ ma.alūm naam

aaj ham karte haiñ un saare shahīdoñ ko salām

rang laayā hai bil-āḳhir un shahīdoñ kā lahū

ho ga.ī āzād ho jaane kī puurī aarzū

aur haiñ takmīl-e-āzādī ke charche chār-sū

ek din ban jā.egā ye mulk jannat hū-bahū

ḳhvāb dekhā thā unhoñ ne us kī ye ta.abīr hai

mulk meñ jaarī har ik unvān se ta.amīr hai

un kī azmat se sabaq leñ aaj ahl-e-eqtidār

kursiyoñ par baiTh jaane se nahīñ miltā vaqār

hukmrānī chhoḌ kar ban jaa.eñ vo ḳhidmat-guzār

naam un kā jāñ-nisārān-e-vatan meñ ho shumār

jis meñ ho matlab-parastī ziist vo nākām hai

zindagī āḳhir 'shifā' qurbāniyoñ kā naam hai

wo parastaran-e-azadi shahidan-e-watan

zinat-e-hindostan hona tha jin ka bankpan

is watan ke waste kya kya sahe ranj-o-mehan

naz ke qabil hai un ki jaan-nisari ka chalan

KHun se sincha watan ki sar-zamin-e-pak ko

martaba iksir ka baKHsha yahan ki KHak ko

zist ki har ek neamat mulk par qurban thi

rahnuma ke ek ishaare par tasadduq jaan thi

KHun daman par na tha un ki yahi pahchan thi

ghaziyan-e-hind ki sab se nirali shan thi

ye sitam-garon ko ulfat ka sabaq de kar gae

jin ko marna chahiye tha un ke badle mar gae

jab hui mahsus aazadi ki un ko ehtiyaj

aur un farman-rawaon se kiya jab ehtijaj

taish se tharra gaya bartaniya ka samraj

zulm se us ke hua bedar phir sara samaj

mulk mein khola unhon ne jang-e-azadi ka bab

samraji zulm jis se ho gaya phir be-naqab

goliyan kitni chalain jaliyan wale bagh par

zulm phir Dhae awadh ki begamon ko mar kar

tin din kis tarah faqe se rahe shah-e-zafar

tisre din tasht par lae gae beTon ke sar

zulm ki tariKH-e-KHunin se hain go nashad hum

aaj ke din faKHr se karte hain un ko yaad hum

aur is ke ba'd bhi qurbaniyan dete rahe

phir bhagat singh aur sathi us ke suli par chaDhe

sar pe lala-lajpat rae ke bhi DanDe paDe

bose babu mulk se bahar hi ja kar mar gae

aur lakhon mar gae jin ke nahin malum nam

aaj hum karte hain un sare shahidon ko salam

rang laya hai bil-aKHir un shahidon ka lahu

ho gai aazad ho jaane ki puri aarzu

aur hain takmil-e-azadi ke charche chaar-su

ek din ban jaega ye mulk jannat hu-bahu

KHwab dekha tha unhon ne us ki ye tabir hai

mulk mein jari har ek unwan se tamir hai

un ki azmat se sabaq len aaj ahl-e-eqtidar

kursiyon par baiTh jaane se nahin milta waqar

hukmrani chhoD kar ban jaen wo KHidmat-guzar

nam un ka jaan-nisaran-e-watan mein ho shumar

jis mein ho matlab-parasti zist wo nakaam hai

zindagi aaKHir 'shifa' qurbaniyon ka nam hai