shahr-ashob

ai shahr-e-rasan-basta

kyā ye tirī manzil hai

kyā ye tirā hāsil hai

ye kaun sā manzar hai

kuchh bhī to nahīñ khultā

kyā terā muqaddar hai

taqdīr-e-fasīl-e-shahr katba hai ki gul-dasta

ai shahr-e-rasan-basta

ab koī bhī ḳhvāboñ par īmān nahīñ rakhtā

kis raah pe jaanā hai kis raah nahīñ jaanā pahchān nahīñ rakhtā

shā.er ho ki sūrat-gar bāġhoñ kī charāġhoñ kī bastī ke sajāne kā sāmān nahīñ rakhtā

jis samt nazar kiije āñkhoñ meñ dar aate haiñ aur ḳhuun rulāte haiñ

yādoñ se bhare dāman lāshoñ se bharā rasta

ai shahr-e-rasan-basta

muddat huī logoñ ko chup maar ga.ī jaise

Thukrā.ī huī ḳhilqat jiine kī kashākash meñ jī haar ga.ī jaise

har saañs ḳhajil Thahrī bekār ga.ī jaise

ab ġham kī hikāyat ho yā lutf kī bāteñ hoñ koī bhī nahīñ rotā koī bhī nahīñ hañstā

ai shahr-e-rasan-basta

ai shahr-e-rasan-basta

kya ye teri manzil hai

kya ye tera hasil hai

ye kaun sa manzar hai

kuchh bhi to nahin khulta

kya tera muqaddar hai

taqdir-e-fasil-e-shahr katba hai ki gul-dasta

ai shahr-e-rasan-basta

ab koi bhi KHwabon par iman nahin rakhta

kis rah pe jaana hai kis rah nahin jaana pahchan nahin rakhta

shaer ho ki surat-gar baghon ki charaghon ki basti ke sajaane ka saman nahin rakhta

jis samt nazar kije aankhon mein dar aate hain aur KHun rulate hain

yaadon se bhare daman lashon se bhara rasta

ai shahr-e-rasan-basta

muddat hui logon ko chup mar gai jaise

Thukrai hui KHilqat jine ki kashakash mein ji haar gai jaise

har sans KHajil Thahri bekar gai jaise

ab gham ki hikayat ho ya lutf ki baaten hon koi bhi nahin rota koi bhi nahin hansta

ai shahr-e-rasan-basta