shahr-e-KHuban shahr-e-maqtal

mire is shahr kī raunaq

baseñ rickshaw Trāmeñ motareñ

aur aadmī sailāb ke mānind

saḌkeñ hamhamātī shor hañgāma tag-o-dau

vaqt kī gardish meñ sub.h-o-shām kā ma.amūl hai

mire is shahr kī raunaq

schōl nā-āshnā lamhe adhūrī ḳhvāhish

ḳhvāboñ ke vīrāne

añdhere shab ke afsāne

mire is shahr kī raunaq

hasīñ bāzār raunaq dukāneñ dilrubā chehre

shagufta koñpleñ āsūda jalve

karb kī lahreñ

ye kaisī karb kī lahreñ haiñ yārab

shahr-e-ḳhūbāñ shahr-e-maqtal ban gayā hai

aur zinda aadmī

qatl-gāh-e-rah-guzar par

rikshoñ basoñ caroñ ke shor-e-garāñ meñ

nīm-jāñ behāl murda

kho chukā hai

e'tibār-e-zindagī

mere is shahr ki raunaq

basen rickshaw Tramen motaren

aur aadmi sailab ke manind

saDken hamhamati shor hangama tag-o-dau

waqt ki gardish mein subh-o-sham ka mamul hai

mere is shahr ki raunaq

school na-ashna lamhe adhuri KHwahish

KHwabon ke virane

andhere shab ke afsane

mere is shahr ki raunaq

hasin bazar raunaq dukanen dilruba chehre

shagufta konplen aasuda jalwe

karb ki lahren

ye kaisi karb ki lahren hain yarab

shahr-e-KHuban shahr-e-maqtal ban gaya hai

aur zinda aadmi

qatl-gah-e-rah-guzar par

rikshon bason caron ke shor-e-garan mein

nim-jaan behaal murda

kho chuka hai

e'tibar-e-zindagi