shahr-e-viran ke aaseb ka sae

magar

shahr-e-vīrāñ

tumhāre gharoñ maqbaroñ kī muñDeroñ chhatoñ par

jo būḌhe parindoñ kī sargoshiyāñ haiñ

bhaTaktī haiñ din raat mere sirhāne

koī ajnabī

ġhair-mānūs āvāz kahtī hai

ḳhudā jab zamīnoñ pe utrā thā

būḌhe parindoñ ko maut aa ga.ī thī

jabhī shahr-e-vīrāñ kī behad purānī

fasīloñ meñ gūñgī darāḌeñ paḌī thiiñ

darāḌeñ jo khīñcheñ nasoñ se harārat

aur aise meñ shahr-e-hazīñ ke sabhī

bāsiyoñ ne panāh maañg lī thī

darāḌoñ ke shar se

purāne shahr se

na.e mausamoñ kī

harārat nasoñ meñ palaT aa.ī

kirnoñ ne sūraj ko paidā kiyā

aur sūraj ne rangoñ ko taqsīm kar ke

jo naqshe jane

un se chehre bane

chehroñ ne gūñgī darāḌoñ ko āvāz dī

aur sajā.e baḌe hī jatan se

galī aur mahalle

khurach kar nishāñ saare maazī ke tere badan se

namak-pāsh chehroñ ne Tisve bahā.e

masājid madāris meñ tārīḳh-nāmoñ ke pahre biThā.e

magar shahr-e-vīrāñ

maiñ vo shor baḳht huuñ

jo būḌhe parindoñ kī sargoshiyoñ meñ

tumhāre batn kī ḳhāmushī sun rahī huuñ

rañgā-rang pardoñ ke pīchhe kī vīrāniyāñ

chun rahī huuñ

magar

shahr-e-viran

tumhaare gharon maqbaron ki munDeron chhaton par

jo buDhe parindon ki sargoshiyan hain

bhaTakti hain din raat mere sirhane

koi ajnabi

ghair-manus aawaz kahti hai

KHuda jab zaminon pe utra tha

buDhe parindon ko maut aa gai thi

jabhi shahr-e-viran ki behad purani

fasilon mein gungi daraDen paDi thin

daraDen jo khinchen nason se hararat

aur aise mein shahr-e-hazin ke sabhi

basiyon ne panah mang li thi

daraDon ke shar se

purane shahr se

nae mausamon ki

hararat nason mein palaT aai

kirnon ne suraj ko paida kiya

aur suraj ne rangon ko taqsim kar ke

jo naqshe jane

un se chehre bane

chehron ne gungi daraDon ko aawaz di

aur sajae baDe hi jatan se

gali aur mahalle

khurach kar nishan sare mazi ke tere badan se

namak-pash chehron ne Tiswe bahae

masajid madaris mein tariKH-namon ke pahre biThae

magar shahr-e-viran

main wo shor baKHt hun

jo buDhe parindon ki sargoshiyon mein

tumhaare batn ki KHamushi sun rahi hun

ranga-rang pardon ke pichhe ki viraniyan

chun rahi hun