shahr ilm ke darwaze par

kabhī kabhī dil ye sochtā hai

na jaane ham be-yaqīn logoñ ko nām-e-haidar se rabt kyuuñ hai

hakīm jaane vo kaisī hikmat se āshnā thā

shajī.a jaane ki badar o ḳhaibar kī fat.h-mandī kā raaz kyā thā

aliim jaane vo ilm ke kaun se safīnoñ kā nā-ḳhudā thā

mujhe to bas sirf ye ḳhabar hai

vo mere maulā kī ḳhushbuoñ meñ rachā-basā thā

vo un ke dāmān-e-ātifat meñ palā baḌhā thā

aur us ke din raat mere aaqā ke chashm o abro o jumbish-e-lab ke muntazir the

vo raat ko dushmanoñ ke narġhe meñ so rahā thā to un kī ḳhātir

jidāl meñ sar se paañv tak surḳh ho rahā thā to un kī ḳhātir

so us ko mahbūb jāntā huuñ

so us ko maqsūd māntā huuñ

sa.ādateñ us ke naam se haiñ

mohabbateñ us ke naam se haiñ

mohabbatoñ ke sabhī gharānoñ kī nisbateñ us ke naam se haiñ

kabhi kabhi dil ye sochta hai

na jaane hum be-yaqin logon ko nam-e-haidar se rabt kyun hai

hakim jaane wo kaisi hikmat se aashna tha

shajia jaane ki badar o KHaibar ki fath-mandi ka raaz kya tha

alim jaane wo ilm ke kaun se safinon ka na-KHuda tha

mujhe to bas sirf ye KHabar hai

wo mere maula ki KHushbuon mein racha-basa tha

wo un ke daman-e-atifat mein pala baDha tha

aur us ke din raat mere aaqa ke chashm o abro o jumbish-e-lab ke muntazir the

wo raat ko dushmanon ke narghe mein so raha tha to un ki KHatir

jidal mein sar se panw tak surKH ho raha tha to un ki KHatir

so us ko mahbub jaanta hun

so us ko maqsud manta hun

saadaten us ke nam se hain

mohabbaten us ke nam se hain

mohabbaton ke sabhi gharanon ki nisbaten us ke nam se hain