shahzade

zehn meñ azmat-e-ajdād ke qisse le kar

apne tārīk gharoñdoñ ke ḳhalā meñ kho jaao

marmarīñ ḳhvāboñ kī pariyoñ se lipaT kar so jaao

abr pāroñ pe chalo, chāñd sitāroñ meñ uḌo

yahī ajdād se virse meñ milā hai tum ko

duur maġhrib kī fazāoñ meñ dahaktī huī aag

ahl-e-sarmāya kī āvezish-e-bāham na sahī

jañg-e-sarmāya o mehnat hī sahī

duur maġhrib meñ hai mashriq kī fazā meñ to nahīñ

tum ko maġhrib ke bakheḌoñ se bhalā kyā lenā?

tīrgī ḳhatm huī surḳh shuā.eñ phailīñ

duur maġhrib kī fazāoñ meñ tarāne gūñje

fat.h-e-jamhūr ke insāf ke āzādī ke

sāhil-e-sharq pe gaisoñ kā dhuāñ chhāne lagā

aag barsāne lage ajnabī topoñ ke dahan

ḳhvāb-gāhoñ kī chhateñ girne lagīñ

apne bistar se uTho

na.e āqāoñ kī ta.azīm karo

aur phir apne gharoñdoñ ke ḳhalā meñ kho jaao

tum bahut der bahut der talak so.e rahe

zehn mein azmat-e-ajdad ke qisse le kar

apne tarik gharondon ke KHala mein kho jao

marmarin KHwabon ki pariyon se lipaT kar so jao

abr paron pe chalo, chand sitaron mein uDo

yahi ajdad se wirse mein mila hai tum ko

dur maghrib ki fazaon mein dahakti hui aag

ahl-e-sarmaya ki aawezish-e-baham na sahi

jang-e-sarmaya o mehnat hi sahi

dur maghrib mein hai mashriq ki faza mein to nahin

tum ko maghrib ke bakheDon se bhala kya lena?

tirgi KHatm hui surKH shuaen phailin

dur maghrib ki fazaon mein tarane gunje

fath-e-jamhur ke insaf ke aazadi ke

sahil-e-sharq pe gaison ka dhuan chhane laga

aag barsane lage ajnabi topon ke dahan

KHwab-gahon ki chhaten girne lagin

apne bistar se uTho

nae aaqaon ki tazim karo

aur phir apne gharondon ke KHala mein kho jao

tum bahut der bahut der talak soe rahe