shakespeare

is tarah aaj phir ābād hai vīrāna-e-dil

ki hai labrez mai-e-shauq se paimāna-e-dil

dil-e-betāb meñ pinhāñ hai har armān-e-nazar

chashm-e-mushtāq meñ hai surḳhi-e-afsāna-e-dil

aaj sham.oñ se ye kah do ki ḳhabar-dār raheñ

aaj bedār hai ḳhākistar-e-parvāna-e-dil

is ko hai ek faqat dekhne vaalā darkār

tuur se kam to nahīñ jalva-e-jānāna-e-dil

jaag bhī ḳhvāb se ai mashriq o maġhrib ke hakīm

ki tire vāste laayā huuñ maiñ nazrāna-e-dil

ye zarā dekh ki aa.e haiñ kahāñ se donoñ

dil tirī ḳhaak kā dīvāna maiñ dīvāna-e-dil

shauq kī raah meñ ik saḳht maqām aayā hai

mirā TuuTā huā dil hī mire kaam aayā hai

sāqī-e-jāñ tire mai-ḳhāne kā ik riñd-e-haqīr

misl-e-bū toḌ ke har qaid-e-maqām aayā hai

allāh allāh tirī bazm kā ye ālam-e-kaif

mere hāthoñ meñ chhalaktā huā jaam aayā hai

tire naam aaj zamāne ke mahakte hue phuul

'ġhālib' o 'mīr' ke gulshan kā salām aayā hai

vo mirī hasrat-e-derīna kā shahbāz-e-jalīl

kitnī muddat meñ bil-āḳhir tah-e-dām aayā hai

tujh ko bhī dil meñ basāyā hai jo 'iqbāl' ke saath

to kahīñ jā ke ye andāz-e-kalām aayā hai

kyuuñ tujhe ye abadī niiñd pasand aa.ī hai

ai ki har lafz tirā shān-e-masīhā.ī hai

sāqi-e-mai-kada-e-zīst zarā aañkh to khol

tirī turbat pe siyah mast ghaTā chhā.ī hai

jaag bhī ḳhvāb se dil-dāda-e-gulzār-o-chaman

ki tire des kī bāġhoñ pe bahār aa.ī hai

jo tire ghar meñ hai aaj us chamanistāñ ko to dekh

zarre zarre ko junūn-e-chaman-ārā.ī hai

'hathaway' kā hai makāñ vo ki ''maqām-e-nau'' hai

jo bhī ḳhitta hai vo ik paikar-e-zebā.ī hai

kuchh ḳhabar bhī hai ki aivāñ kī hasīñ maujoñ meñ

jo tire daur meñ thī ab bhī vo ra.anā.ī hai

vo tirā naġhma ki sīnoñ meñ tapāñ aaj bhī hai

ahl-e-ehsās kā sarmāya-e-jāñ aaj bhī hai

riñd haiñ mashriq o maġhrib meñ usī ke mushtāq

vo tirā bāda-e-kohna ki javāñ aaj bhī hai

aaj bhī ka.aba-e-arbāb-e-nazar hai tirī fikr

virsa-e-ahl-e-junūñ terā bayāñ aaj bhī hai

aaj se chaar sadī qabl jo chamkā thā kabhī

tire naġhmāt meñ vo soz-e-nihāñ aaj bhī hai

jis meñ hai baada junūñ kā bhī mai-e-hosh ke saath

tire hāthoñ meñ vahī ratl-e-girāñ aaj bhī hai

tū ne tamsīl ke jaade pe dikhāyā jo kabhī

vahī miil aur vahī sañg-e-nishāñ aaj bhī hai

zulmat-e-dahr kī rātoñ meñ sahar-bār hai tū

ziist ik qāfila hai qāfila-sālār hai tū

tū har ik daur meñ hai dīda-e-bīnā kī tarah

har zamāne meñ dil-e-zinda-o-bedār hai tū

jis kī bātoñ meñ dhaḌaktā hai dil-e-asr-e-ravāñ

aaj tamsīl-e-zamāna kā vo kirdār hai tū

kyuuñ na ho lauh o qalam ko tire uslūb pe naaz

hasan-e-guftār hai ganjīna-e-afkār hai tū

bazm-e-jānāñ ho to andāz tirā phuul kī shāḳh

zulm ke sāmne shamshīr-e-jigar-dār hai to

tū kisī mulk kisī daur kā fankār nahīñ

balki har mulk kā har daur kā fankār hai tū

is tarah aaj phir aabaad hai virana-e-dil

ki hai labrez mai-e-shauq se paimana-e-dil

dil-e-betab mein pinhan hai har arman-e-nazar

chashm-e-mushtaq mein hai surKHi-e-afsana-e-dil

aaj shamon se ye kah do ki KHabar-dar rahen

aaj bedar hai KHakistar-e-parwana-e-dil

is ko hai ek faqat dekhne wala darkar

tur se kam to nahin jalwa-e-jaanana-e-dil

jag bhi KHwab se ai mashriq o maghrib ke hakim

ki tere waste laya hun main nazrana-e-dil

ye zara dekh ki aae hain kahan se donon

dil teri KHak ka diwana main diwana-e-dil

shauq ki rah mein ek saKHt maqam aaya hai

mera TuTa hua dil hi mere kaam aaya hai

saqi-e-jaan tere mai-KHane ka ek rind-e-haqir

misl-e-bu toD ke har qaid-e-maqam aaya hai

allah allah teri bazm ka ye aalam-e-kaif

mere hathon mein chhalakta hua jam aaya hai

tere nam aaj zamane ke mahakte hue phul

'ghaalib' o 'mir' ke gulshan ka salam aaya hai

wo meri hasrat-e-derina ka shahbaz-e-jalil

kitni muddat mein bil-aKHir tah-e-dam aaya hai

tujh ko bhi dil mein basaya hai jo 'iqbaal' ke sath

to kahin ja ke ye andaz-e-kalam aaya hai

kyun tujhe ye abadi nind pasand aai hai

ai ki har lafz tera shan-e-masihai hai

saqi-e-mai-kada-e-zist zara aankh to khol

teri turbat pe siyah mast ghaTa chhai hai

jag bhi KHwab se dil-dada-e-gulzar-o-chaman

ki tere des ki baghon pe bahaar aai hai

jo tere ghar mein hai aaj us chamanistan ko to dekh

zarre zarre ko junun-e-chaman-arai hai

'hathaway' ka hai makan wo ki maqam-e-nau hai

jo bhi KHitta hai wo ek paikar-e-zebai hai

kuchh KHabar bhi hai ki aiwan ki hasin maujon mein

jo tere daur mein thi ab bhi wo ranai hai

wo tera naghma ki sinon mein tapan aaj bhi hai

ahl-e-ehsas ka sarmaya-e-jaan aaj bhi hai

rind hain mashriq o maghrib mein usi ke mushtaq

wo tera baada-e-kohna ki jawan aaj bhi hai

aaj bhi kaba-e-arbab-e-nazar hai teri fikr

wirsa-e-ahl-e-junun tera bayan aaj bhi hai

aaj se chaar sadi qabl jo chamka tha kabhi

tere naghmat mein wo soz-e-nihan aaj bhi hai

jis mein hai baada junun ka bhi mai-e-hosh ke sath

tere hathon mein wahi ratl-e-giran aaj bhi hai

tu ne tamsil ke jade pe dikhaya jo kabhi

wahi mil aur wahi sang-e-nishan aaj bhi hai

zulmat-e-dahr ki raaton mein sahar-bar hai tu

zist ek qafila hai qafila-salar hai tu

tu har ek daur mein hai dida-e-bina ki tarah

har zamane mein dil-e-zinda-o-bedar hai tu

jis ki baaton mein dhaDakta hai dil-e-asr-e-rawan

aaj tamsil-e-zamana ka wo kirdar hai tu

kyun na ho lauh o qalam ko tere uslub pe naz

hasan-e-guftar hai ganjina-e-afkar hai tu

bazm-e-jaanan ho to andaz tera phul ki shaKH

zulm ke samne shamshir-e-jigar-dar hai to

tu kisi mulk kisi daur ka fankar nahin

balki har mulk ka har daur ka fankar hai tu