شمع سحر

دل میں تپش ہے آتش بجاں ہے

سوز دروں سے شعلہ فشاں ہے

جو حال دل ہے سب پر عیاں ہے

آنسو رواں ہے گریہ کناں ہے

ہچکی ہے پیہم رنگ دگر ہے

بجھنے کو شاید شمع سحر ہے

کیا بے بسی ہے کیا بے کسی ہے

جھلمل سی کرتی اک روشنی ہے

سر دھن رہی ہے اک بیکلی ہے

اور چپکے چپکے جل بجھ رہی ہے

اکھڑی ہوئی سی سانس آ رہی ہے

اک آ رہی ہے اک جا رہی ہے

رہ رہ کے دل سے ہوک اٹھ رہی ہے

بے چارگی ہے اور بے خودی ہے

اب ختم تیری یہ زندگی ہے

عرفان کس کو یا آگہی ہے

تو نے لٹائے اے شمع تن من

تجھ کو مبارک یہ پریم بندھن

اے شمع سوزاں بیمار‌ الفت

رکھتا ہوں میں بھی داغ محبت

جل بجھ چکے ہیں ارمان و حسرت

مجھ کو بھی شاید تجھ سے ہے نسبت

میری بھی اب ہے تیری سی ہائی

دل کی لگی اب پاؤں تک آئی