shampain aur main

barf se lakḌī kashīd karte hue

ek dūsre ko ghūrte haiñ

bārīk filter vaale cigarette kī rag meñ

sho.ale kā lahū ThanDā paḌ gayā hai

marmarīñ sargoshiyāñ

camp ke nuqra.ī sannāTe kī khaal kāTtī haiñ

botal kī shiknoñ meñ ūñghtī boriyat

dhuñd kā lams pī rahī hai

ariana ke thirakte hue kāsnī hoñT

ḳhvāb ke niile māthe se baal haTā kar

narm bose taḳhlīq karte haiñ

aphrodite ke jism se pighaltī

nisvānī kashish kī bhīgī uljhan

kaafī ke daane chaaT rahī hai

barf kī god meñ lamhe

qadīm yūnānī bāshindoñ kī tarah

lazzat kī aag taap rahe haiñ

junūñ ke Dhīle badan meñ

zabt kī kamān TūTnā chāhtī hai

barf se lakDi kashid karte hue

ek dusre ko ghurte hain

barik filter wale cigarette ki rag mein

shoale ka lahu ThanDa paD gaya hai

marmarin sargoshiyan

camp ke nuqrai sannaTe ki khaal kaTti hain

botal ki shiknon mein unghti boriyat

dhund ka lams pi rahi hai

ariana ke thirakte hue kasni honT

KHwab ke nile mathe se baal haTa kar

narm bose taKHliq karte hain

aphrodite ke jism se pighalti

niswani kashish ki bhigi uljhan

kafi ke dane chaT rahi hai

barf ki god mein lamhe

qadim yunani bashindon ki tarah

lazzat ki aag tap rahe hain

junun ke Dhile badan mein

zabt ki kaman TuTna chahti hai