shanaKHt

shanāḳht us ke naam se thī

jism kī bahār se

shanāḳht āftāb se thī

zulf-e-ābshār se

shanāḳht pairahan se thī

ġhazāl-e-nūr-bār se

shanāḳht us ke shabnamī

fishār ātishīñ se thī

zamīn-doz āsmāñ-sifat ḳhumār se

khulī huī thī duur duur tak

tabassumoñ kī surḳh dhuup

tez raushnī

tamām shafqatoñ kī narm chāñdnī

malā.ik-o-nujūm

aaj saare be-murād ho ga.e

shanāḳhteñ ujaḌ ga.iiñ

sulagte bām-o-dar ke darmiyāñ

shumār ho rahe haiñ soḳhta burīda jism

reza reza kuchh makāñ

vo be-shanāḳht ho ga.ī

vo ḳhvāb thī

vo ik hasīn naam thī

vo naam se bichhaḌ ga.ī

shanaKHt us ke nam se thi

jism ki bahaar se

shanaKHt aaftab se thi

zulf-e-abshaar se

shanaKHt pairahan se thi

ghazal-e-nur-bar se

shanaKHt us ke shabnami

fishaar aatishin se thi

zamin-doz aasman-sifat KHumar se

khuli hui thi dur dur tak

tabassumon ki surKH dhup

tez raushni

tamam shafqaton ki narm chandni

malaik-o-nujum

aaj sare be-murad ho gae

shanaKHten ujaD gain

sulagte baam-o-dar ke darmiyan

shumar ho rahe hain soKHta burida jism

reza reza kuchh makan

wo be-shanaKHt ho gai

wo KHwab thi

wo ek hasin nam thi

wo nam se bichhaD gai